Qazaqstan men AQSh strategııalyq yntymaqtastyq perspektıvalaryn talqylady
Otyrystyń negizgi maqsaty – ótken jartyjyldyqtaǵy birlesken jumysty qorytyndylaý jáne eki el arasyndaǵy strategııalyq áriptestikti odan ári keńeıtý perspektıvalaryn aıqyndaý boldy.
«Bul bizdiń qarym-qatynasymyzdaǵy mańyzdy kezeń. Sharanyń kún tártibi jahandyq, óńirlik qaýipsizdik salasyndaǵy ózara is-qımyldy, quqyq qorǵaý salasyndaǵy yntymaqtastyqty, klımattyń ózgerýin, bilim almasýdy jáne basqalaryn qosa alǵanda, keń aýqymdy máselelerdi qamtıdy. Ásirese, saýda-ekonomıkalyq, ınvestıtsııalyq yntymaqtastyqty talqylaýǵa erekshe nazar aýdarylady», - dedi Aqan Rahmetýllın Syrtqy ister mınıstrliginde jýrnalısterge arnalǵan brıfıngte.
Óz kezeginde AQSh Memlekettik hatshysynyń kómekshisi Donald Lý óz eliniń Qazaqstan úshin senimdi seriktes ekenin atap ótti.
«Biz ekonomıkanyń túrli sektorlarynda, ásirese munaı-gaz salasynda óte belsendi jumys istedik. Osy 30 jyl ishinde biz 37 mlrd dollar ınvestıtsııa ákeldik. Aldaǵy ýaqytta da Qazaqstannyń seriktesi bolyp, «jasyl» ekonomıkaǵa kóshýge atsalysqymyz keledi, jańartylatyn energııa kózderine – jel, kún energııasy, gıdroenergetıkaǵa ınvestıtsııa salmaqshymyz Bizdiń elderimiz óz tarıhyndaǵy eń berik qarym-qatynastarǵa ıe.
Qazir biz COVID-19, jahandyq jylyný, Aýǵanstandaǵy daǵdarys sııaqty birqatar syn-qaterge tap boldyq. AQSh uzaq jyl Qazaqstannyń senimdi seriktesi bolyp qala beredi dep úmittenemin. Men osynda kelip, Táýelsizdiktiń 30 jyldyǵyn sizdermen birge atap ótkenime qýanyshtymyn», - dedi Donald Lý.
Aıta keteıik, búgingi otyrystyń kún tártibi saıası, saýda-ekonomıkalyq jáne ınvestıtsııalyq, mádenı-gýmanıtarlyq, ǵylymı-tehnıkalyq salalardaǵy ekijaqty qatynastardyń ózekti máselelerin jáne adam quqyqtary, adam saýdasy jáne basqa da máselelerdi qamtydy. Otyrys qorytyndysy boıynsha birlesken málimdeme qabyldandy.
