Qazaqstan men AQSh Birlesken málimdemege qol qoıdy
ASTANA. KAZINFORM – AEHA-nyń 69-shy Bas konferentsııasy aıasynda Qazaqstan Atom energııasy jónindegi agenttigi men AQSh Energetıka mınıstrliginiń ıAdrolyq qaýipsizdik jónindegi ulttyq ákimshiligi (NNSA) arasynda Birlesken málimdemege qol qoıyldy.
Qujatta atap ótilgender:
•IVG.1M zertteý reaktorynyń joǵary baıytylǵan paıdalanylǵan otynyn arnaıy ázirlengen Silo tıpindegi qoımaǵa tabysty ornalastyrý;
•paıdalanylǵan ıadrolyq otyndy Silo qoımasynda onyń túpkilikti kádege jaratylýyna qatysty birlesken sheshim qabyldanǵanǵa deıin saqtaý;
•joǵary baıytylǵan ýrandy paıdalanýdy barynsha azaıtý jáne ıadrolyq qarýdy taratpaý rejımin nyǵaıtý jónindegi yntymaqtastyqty jalǵastyrý nıeti.
– Qazaqstan ıadrolyq qaýipsizdik salasyndaǵy halyqaralyq mindettemelerin dáıekti túrde oryndaıdy. Atalǵan málimdemege qol qoıý bizdiń beıbit atomdy damytýǵa jáne jahandyq taratpaý rejımin nyǵaıtýǵa beıildigimizdi rastaıdy, – dep atap ótti Qazaqstan Atom energııasy jónindegi agenttiginiń tóraǵasy.
NNSA ókilderi AQSh-tyń Qazaqstanmen yntymaqtastyqty joǵary baǵalaıtynyn jáne ıadrolyq qaýipsizdikti arttyrýǵa baǵyttalǵan birlesken jobalardy jalǵastyrýǵa nıetti ekenin atap ótti.
Osyndaı Birlesken málimdemeler 2016, 2019, 2020 jáne 2023 jyldary da qabyldanyp, Qazaqstan men AQSh-tyń beıbit atom salasyndaǵy turaqty áriptestiginiń sımvolyna aınaldy.
Aıta keteıik, Qazaqstan AEHA-nyń 69-shy Bas konferentsııasynda atom energetıkasynyń jańa damý kezeńin jarııalady.