Qazaqstan mektepteri qansha pándi aǵylshyn tilinde oqytatynyn ózderi tańdaıdy
QR Parlamenti Májilisiniń plenarlyq otyrysynda depýtat Jamılá Nurmambetova tórt pándi aǵylshyn tilinde oqytý úshin shamamen 32 myń muǵalimniń qajettigin aıtty. Al búginde arnaıy daıyndyqtan 11,5 myń muǵalim ǵana ótken.
«Úkimet esebindegi derekterge sáıkes, aǵylshyn tilinde oqytqany úshin tek 725 muǵalim ǵana tıisti ústemeaqy alady.Demek, 725 muǵalim ǵana tolyqqandy aǵylshyn tilinde júrgize alady, bul jalpy qajettiliktiń 2% quraıdy. Arnaıy oqytylǵan muǵalimderdiń 1370-i termınderdi ǵana úırete alady, qalǵandary múldem sabaq bermeıdi. Mundaı qarqynmen bir jyl emes, eki nemese úsh jyl qajet bolady. Sonymen birge, Prezıdent Joldaýynda 2019 jyldan bastap, 10-11 synyptarda keıbir pánder aǵylshyn tilinde beriledi dep jazylǵan. Osyǵan baılanysty, Memleket basshysy qoıǵan tapsyrmany qalaı júzege asyratynyńyzdy bilgim keledi», - dep suraq qoıdy Jamılá Nurmambetova Bilim jáne ǵylym mınıstrine.
Óz kezeginde Erlan Saǵadıev mınıstrlik bul máselede óz ustanymyn ózgertkenin málim etti. Máselen, mektepter aǵylshyn tilinde qansha pándi oqytqysy keletinin ózderi tańdaıtyn bolady.
«Qazir mınıstrliktiń strategııasy ózgerdi, mektepte synyp pen olardyń ata-analarynyń tilekterine baılanysty 1-den 4-ke deıingi pánderdi aǵylshyn tilinde oqytýǵa tańdaý quqyǵy beriledi. Bul oqytýshylarmen ǵana emes, halyqtyń da tańdaý quqyǵyn suraýymen tikeleı baılanysty», - dedi mınıstr.
Onyń aıtýynsha, bıyl alǵashqy 12 myńǵa jýyq muǵalim aǵylshyn tilinde sabaq berý kýrsynan ótken. Erlan Saǵadıev eki myń muǵalimniń sabaq berýge kirisip ketkenin, biraq ústemeaqynyń bárine tólenbegenin atap ótti. Bul máseleniń mán-jaıy anyqtalyp jatyr.
«Qyrkúıek aıynan bastap, taǵy 2 myń muǵalim aǵylshyn tilinde sabaq berýge nıet bildirdi. 8300 muǵalim V2 deńgeıine jetý úshin oqýdy jalǵastyrady. Bul deńgeıge jetpeıinshe, muǵalimdi sabaq berýge jibere almaımyz. Qosymsha, pedagogıkalyq fakýltetterdiń 6 myń túlegi bakalavrıat jáne jáne magıstratýra deńgeıinde aǵylshyn tilinde sabaq berýdi úırenip júr. Sondyqtan, eki jylda bul tapsyrmany oryndaımyz dep aıta almaımyn. 3-4 jyldan keıin barlyq mektepter eń kemi - bir pándi nemese 4 pándi aǵylshyn tilinde oqytýǵa kóshe alady», - dep túıindedi sózin mınıstr.