Qazaqstan mamandary kelesi «Protonnyń» ushyrylymyna qatysady

ASTANA. QazAqparat - Qazaqstan mamandary kelesi «Protonnyń» ushyrylymy jumystaryna qatysady. Bul týraly Astanada Qazaqstan men Reseıdiń yntymaqtastyǵyna arnalǵan «dóńgelek ústel» barysynda «Báıterek» Birlesken kásiporny jobalaý keńsesiniń dırektory Oleg Balıtskıı málim etti, dep habarlaıdy QazAqparat.

«Qazirgi kezde «Qazǵarysh» pen «Roskosmos» arasynda qoldanystaǵy nysandar bazasynda bizdiń keshendi jáne ortasha sanattaǵy jańa perspektıvaly zymyran-tasyǵyshty qurý nusqasy boıynsha tıisti ýaǵdalastyq bar. Búginde zymyran-tasyǵyshty qurý sharalary iske asyrylýda»,-dedi O.Balıtskıı.

Onyń sózine qaraǵanda, osy josparlardy iske asyrý úshin birqatar qujattarǵa qol qoıylyp, Jol kartasy ázirlendi. Jańa perspektıvaly zymyran-tasyǵyshtyń quny shamamen 500 mln. dollardy quraıdy dep kútilýde. Ony jasaý jumystaryna reseılik tarap jaýap beredi.

Al Qazaqstan jaǵy «Baıqońyr» ǵarysh aılaǵynda qoldanystaǵy nysandardy jetildirýge jaýapty. Bul baǵyttaǵy jumystar 245 mln. dollarǵa baǵalanyp otyr. Jobany túpkilikti júzege asyrý merzimi 2025 jylǵa belgilendi.

Balıtskııdiń aıtýynsha, daıyndyq jumystary 2016-2018 jyldary atqarylady, osy ýaqytta ınvestıtsııalyq usynystar men tehnıkalyq-ekonomıkalyq negizdeme ázirlenip, qorǵalady.

Belgili bolǵandaı, 2019-2023 jyldary jobany qarjylandyrý men ǵarysh aılaǵynda qurylys-montajdaý, konstrýktorlyq jumystardy atqarý qarastyrylǵan. 2025 jylǵa deıin synaqtan ótkizý sharalary atqarylady, al sodan keıin zymyrandy ushyrý júzege asyrylmaq.

Bódan bólek ol «Proton-M» zymyran-tasyǵyshynyń 2017 jylǵy alǵashqy ushyrylymy 29 mamyrǵa josparlanyp otyrǵanyn, bul baǵyttaǵy jumystarǵa qazaqstandyq mamandar da qatysyp jatqandyǵyn jetkizdi. Olar júıelerdi iske qosý men tehnıkalyq qyzmet kórsetý sharalaryna jumyldyrylady.