Qazaqstan-Qytaı shekarasyndaǵy beketter tıimdiligin arttyrý jónindegi jospar talqylandy

ASTANA. QazAqparat - QR Premer-Mınıstri Álıhan Smaıylovtyń tóraǵalyǵymen ótken keńeste Qazaqstan-Qytaı shekarasyndaǵy baqylaý-ótkizý beketteriniń tıimdiligin arttyrý jónindegi sharalardy iske asyrý boıynsha máseleler talqylandy, dep habarlaıdy QR Úkimetiniń baspasóz qyzmeti.

QR QM Memlekettik kirister komıtetiniń basshysy Danııar Janalınov qabyldanǵan sharalardyń nátıjesinde sońǵy aptada «Nur Joly» beketiniń ótkizý qabilettiligi edáýir artqanyn baıandady. Atap aıtqanda, 19 naýryzda QHR-dan QR-ǵa 680-nen astam júk kóligi (13 naýryzda shamamen 150 kólik), al QR-dan QHR-ǵa 140-qa jýyq kólik ótken. Shekaradaǵy kezek alǵashqy kúnderi naqty 300 kólikten 20 naýryzdaǵy jaǵdaı boıynsha shamamen 70 kólikke deıin azaıdy. Qazaqstan jaǵynda kóbine Qytaı vızalaryn alýdy kútip otyrǵan tasymaldaýshylar basym.

Premer-Mınıstr Syrtqy ister mınıstrliginiń kómegimen bul protsesti jedeldetý, sondaı-aq qazaqstandyq kompanııalardy halyqaralyq tasymaldarǵa shyǵýyn ońaılatý jónindegi sharalardy qabyldaý qajettigin atap ótti.

Sonymen qatar Álıhan Smaıylov shekaralyq baqylaý-ótkizý beketterindegi elektrondyq kezekti qalyptastyrý tásilderin qaıta qaraýdy jáne ońtaılandyrýdy tapsyrdy. Onyń aıtýynsha, bul protsesti ashyq ári tıimdi júrgizý úshin «Atameken» UKP-ny tartý kerek.