Qazaqstan qylmys ındeksi boıynsha álem elderi reıtınginde 48-orynda tur

ASTANA. QazAqparat – Qazaqstan qylmys ındeksi boıynsha álem elderi reıtınginde 142 memlekettiń ishinde 48-orynda tur. Elimizdiń ındeksi – 52,7. Indeks joǵary bolǵan saıyn eldegi qylmys deńgeıi de joǵary sanalady, dep habarlaıdy QazAqparat tilshisi.

Finprom.kz portalynyń málimetinshe, ındeks saýalnama arqyly eldegi qylmystyń jalpy deńgeıin baǵalaıdy. Reıtıng qurastyrýshylary ındeks 20-dan az bolsa, onda qylmys deńgeıi óte tómen, 20-40 aralyǵynda – tómen, 40-60 aralyǵynda – ortasha, 60-80 aralyǵynda – joǵary, al 80-nen assa óte joǵary dep sanaıdy.

TMD elderiniń arasynda Qazaqstanǵa qaraǵanda qylmys deńgeıi Belarýs pen Qyrǵyzstanda birshama joǵary. Al Moldova, Ýkraına, Reseı jáne Ózbekstan qaýipsiz dep sanalady.

Qylmys órshigen elderdiń eń basynda Venesýela, Papýa – Jańa Gvıneıa jáne Aýǵanstan tur. Álemdegi eń qaýipsiz el – Qatar.

2022 jyldyń qorytyndysynda elimizde 157,5 myń qylmystyq quqyq buzýshylyq tirkeldi. Bul 2021 jylǵy kórsetkishten 0,3 paıyzǵa az. Quqyq buzýshylyqtyń basym bóligi Almaty qalasynda (34,9 myń), Astanada (17,1 myń) jáne Almaty oblysynda (12,6 myń), eń azy Ultyaý, Jetisý jáne Abaı oblystarynda tirkelgen.