Qazaqstan quramasy kúresten alǵashqy Olımpıada lıtsenzııasyna ıe boldy
QR Týrızm jáne sport mınıstri Ermek Marjyqpaev kúresten álem chempıonatynda Qazaqstan quramasy alǵashqy medal men olımpıadalyq lıtsenzııaǵa ıe bolǵanyn málimdedi, dep habarlaıdy QazAqparat.
Erkin kúres sheberi Azamat Dáýletbekov 86 kelige deıingi salmaqta óner kórsetip, osy kúnderi Serbııada ótip jatqan álem chempıonatynyń qola júldesin jeńip alǵan.
«Bahreın ókiline qarsy ótken «jubanysh fınalynda» bizdiń sportshy óziniń sheberligin ǵana emes, minezin de kórsete otyryp, sońǵy sekýndtarda jeńisti julyp aldy. Azamat pen Qazaqstan quramasynyń jattyqtyrýshylar shtabyn osy nátıjemen quttyqtaımyn, sondaı-aq Parıj Olımpıadasynda elimizdi laıyqty túrde tanytýǵa tilektespin», - deıdi mınıstr.
Ol sondaı-aq, taǵy bir qazaqstandyq palýan Rızabek Aıtmuhannyń 92 kelige deıingi salmaq dárejesindegi fınalǵa senimdi túrde joldama alǵanyn atap ótken. Búgin ol álem chempıony ataǵy úshin kúresetin bolady.
