Qazaqstan quramasy kórkem gımnastıkadan Challenge Cup týrnırinde baq synaıdy

ASTANA. KAZINFORM – Kórkem gımnastıkadan Qazaqstan quramasy 25-27 shilde aralyǵynda Klýj-Napoka (Rýmynııa) qalasynda ótetin World Challenge Cup týrnırinde synǵa túsedi. Bul bedeldi jarys Halyqaralyq gımnastıka federatsııasynyń (FIG) kúntizbesine engen.

Ulttyq olımpıadalyq komıtettiń habarlaýynsha, atalmysh týrnırge 42 elden 200-ge jýyq sportshy qatysady. Al Qazaqstan atynan bul dodada 8 sportshy synǵa túsedi. 

Týrnır aıasynda Aıbota Ertaıqyzy jáne Aıym Meıirjanova jekeleı saıysta óner kórsetedi. Al toptyq jattyǵýlarǵa qatysatyn qazaqstandyqtardyń tizimi tómendegideı.

Olar:

- Aıda Hákimjanova

- Aızere Keńes

- Jasmın Júnisbaeva

- Krıstına Chepýlskaıa

- Aızere Nurmaǵambetova

- Madına Myrzabaı. 

Qazaqstan quramasy taıaýda Sıngapýrde ótken Azııa birinshiliginde úzdik nátıje kórsetti. Sol jarysta otandastarymyz toptyq jattyǵýlarda jáne jekeleı synda tamasha kózge túsip, 2 altyn, 1 kúmis jáne 2 qola medalǵa qol jetkizgen.

– Sıngapýrde ótken Azııa chempıonatynan keıin qyzdar sál tynyǵyp aldy. Qazir Astanadaǵy ózderiniń turaqty jattyǵý ortalyǵynda daıyndyqty qaıta jalǵastyryp jatyr. Aldaǵy álem kýbogy 18-25 tamyz aralyǵynda Brazılııada ótetin álem chempıonatynyń aldyndaǵy sońǵy saıys bolmaq, - dedi ulttyq quramanyń bas bapkeri Lola Ádilbekova.

Buǵan deıin HHHІІ Dúnıejúzilik jazǵy Ýnıversıadada kórkem gımnastıkadan Aıbota Ertaıqyzy qola júlde enshilep, qurama qorjynyna alǵashqy medaldi salǵan edi.