Qazaqstan qubyr jelisi: Munaıdy kim jáne qaıda jóneltedi
ASTANA. KAZINFORM – Qazaqstanyń munaı tasymaldaý naryǵynda úsh kásiporyn munaıdy eksportqa shyǵarý úshin magıstraldy qubyr jelilerin paıdalanady. Olar: «QazTransOıl» AQ, «Qazaqstan-Qytaı qubyr jelisi» JShS jáne «MunaıTas» soltústik-batys qubyr jelisi» JShS. Munaıdyń qaıda jetkiziletinin jáne jetkizý qunynyń qansha ekenin Kazinform agenttigi materıalynan oqyńyzdar.
Básekelestikti qorǵaý jáne damytý agenttigi munaı eksportynyń taýarlyq naryǵy týraly qorytyndy jarııalady. Olar magıstraldy qubyr jelileriniń úsh menshik ıesi de Qytaı men ishki naryqqa munaı ónimderin túrli kólemde jetkizedi nemese tasymaldaýdy júzege asyrady. Úsheýiniń ishinde tek «QazTransOıl» ǵana Eýropaǵa munaıdy tikeleı jetkizedi. Olardyń qubyr jelisi Qazaqstandaǵy eń uzyn qubyr sanalady – 5 372 shaqyrym. Ol Qazaqstandaǵy munaı óńdeý zaýyttaryn bir-birimen jalǵaıdy. Ózen-Atyraý-Samara baǵytynda sozylyp jatyr jáne Aqtaý aılaǵyna deıin jetip, Kaspıı qubyr jelisi júıesimen jáne Atasý-Alashankoý qubyr jelisimen jalǵasady.
«QazTransOıl» AQ – ulttyq operator, sonymen qatar «Qazaqstan-Qytaı qubyr jelisi» JShS jáne «MunaıTas» soltústik-batys qubyr jelisi» JShS, «Kaspıı qubyr jelisi konsortsıýmy-K» AQ magıstraldy munaı jelisi kompanııalaryna paıdalaný jáne tehnıkalyq qyzmet kórsetedi.
Qazaqstan-Qytaı qubyr jelisi Atasý-Alashankoý jáne Keńqııaq-Qumkól munaı qubyrlaryna ıelik etedi. Olardyń jalpy uzyndyǵy 1 759 shaqyrymdy quraıdy. Ol Qazaqstan men Reseı munaıyn Qytaıǵa negizgi jetkizýshi sanalady.
«MunaıTas» soltústik-batys qubyr jelisi» JShS Batys Qazaqstan munaıynyń munaı óńdeý zaýyttaryna jetkizilýin qamtamasyz etedi jáne Keńqııaq-Atyraý munaı qubyrynyń keri qımyl jobasynyń arqasynda Aqtóbe jáne Qyzylorda oblystarynda munaı óndirýdiń tómendeýiniń áserin beıtaraptandyrady. Jalpy uzyndyǵy – 449 shaqyrym.
Aıta keterligi, Qazaqstan «Kaspıı qubyr konsortsıýmy» (KQK) halyqaralyq munaı tasymaldaý jobasynyń da qatysýshysy sanalady. Onyń uzyndyǵy 1510 shaqyrym (452 shaqyrymy Qazaqstan bóligi). Munaı qubyry Qazaqstannyń Teńiz munaı ken ornyn Qara teńizdegi Ońtústik Ozereevka munaı termınalymen baılanystyrady.
KQK aktsıonerleri:
* «Transneft» JAQ atynan Memlekettik múlikti basqarý federaldy agenttigi (senimdi basqarý) – 24%,
* «KTK kompanı» – 7%,
* «QazMunaıGaz» UK AQ – 19%,
* Kazakhstan Pipeline Ventures LLC – 1,75%,
* Chevron Caspian Pipeline Consortium Company – 15%,
* LUKARCO B.V. – 12,5%,
* Mobil Caspian Pipeline Company – 7,5%,
* Rosneft-Shell Caspian Ventures Limited – 7,5%,
* BG Overseas Holdings Limited – 2%,
* Eni International N.A. N.V. S.ar.l. – 2%,
* Oryx Caspian Pipeline LLC – 1,75%.
Aıta keteıik, «QazTransOıl» AQ-nyń magıstraldy qubyr jelisi arqyly ishki naryqta 1 000 shaqyrymǵa munaı tasymaldaý tarıfi tonnasyna 4 355 teńge, Qazaqstan Respýblıkasynan tysqary jerlerge eksportqa munaı tasymaldaý tonnasyna 10 150 teńge, Reseı munaıyn munaı qubyry arqyly tasymaldaý tarıfi Qazaqstan Respýblıkasynyń Qytaıǵa deıingi aýmaǵy arqyly tonnasyna 4,23 dollar.
