Qazaqstan konfessııa, mádenıet, din jáne órkenıet dıalogyn damytý tájirıbesimen bólisti
N.Nazarbaev ortalyǵynyń basqarma tóraǵasy Qazaqstan barlyq elderdi jáne kóshbasshylardy únemi daǵdarystardyń, ásirese rýhanı jáne dinı daǵdarystyń aldyn-alý is-sharalaryn qabyldaýǵa shaqyratynyn basa aıtty. Sondaı-aq, álemdik saıasatta dinder, mádenıetter dıalogynyń ıdeıalary men qundylyqtaryn ilgeriletýde sheshýshi ról atqaratyn Mysyrdyń ustanymy Qazaqstan úshin úlken qyzyǵýshylyq týdyratynyn jetkizdi.
«Ózderińiz biletindeı, Mysyr Arab Respýblıkasy Qazaqstan úshin Taıaý Shyǵys aımaǵynda, arab áleminde jáne musylman qaýymdastyǵynda mańyzdy seriktes bolyp sanalady. Mysyr tájirıbesindegi biz úshin eń mańyzdysy - áleýmettik, dinı tepe-teńdikti saqtaý máselesin tek memlekettik ınstıtýttardyń kúshteri sheshe almaıtynyn túsiný. Bul úılesimdilik pen qaýipsizdikke qol jetkizýdegi rýhanı mıssııasyn baǵalaý qıyn bolatyn álemdik jáne dástúrli dinder lıderleri arasyndaǵy keń dıalogty qajet etedi. Mysyr basshylyǵy men Mysyrdyń joǵarǵy dinı qyzmetkerleri Qazaqstan Respýblıkasynyń Tuńǵysh Prezıdenti - Elbasy Nursultan Ábishuly Nazarbaevtyń bastamasymen ótetin Álemdik jáne dástúrli dinder lıderleri sezine alǵashqylardyń biri bolyp qoldaý kórsetti. Qazaqstan Táýelsizdiktiń 30 jylynda mádenıetter men órkenıetter dıalogyn damytýdaǵy, ártúrli konfessııa ókilderiniń eń ózekti máselelerin sheshýdegi dıalog alańyna aınalyp úlgergeni anyq», - dedi Bolat Sársenbaev.
Sonymen qatar, N.Nazarbaev ortalyǵynyń basshysy Mysyr Arab Respýblıkasynyń Joǵarǵy Múftıi Shaýkı Allıammen, Mysyr Arab Respýblıkasy Parlamenti Din isteri komıteti tóraǵasynyń orynbasary Ýsama Muhammed Hasan Al-Abdpen, «Academic International de Lyon» ortalyǵynyń bas dırektory Muhammed Tarvatpen, Mysyr gazetiniń basqarma tóraǵasy Abdýlla Radjab ash-Sharıfpen jáne aldaǵy Álemdik dástúrli dinder lıderleriniń Seziniń basqa da áleýetti qatysýshylarymen kezdesti.
«Halyqaralyq konferentsııa aıasynda jetekshi ǵylymı ortalyqtardyń, ýnıversıtetterdiń álemdik sarapshylary, dinı birlestikter men halyqaralyq uıymdardyń ókilderi, arab elderiniń Vakýftar jónindegi mınıstrleri, Mysyr Arab Respýblıkasy parlamentiniń depýtattary, shet memleketter, sonymen qatar Egıpettiń bedeldi qoǵamdyq jáne saıası qaıratkerleri álemdegi dinı ahýaldy damytýdyń ózekti máselelerin, COVID-19 pandemııa kezindegi ózgerister jaǵdaıyn, mádenıetaralyq dıalog pen rýhanı birlikti nyǵaıtý máselelerin talqylady», - delingen atalǵan ortalyq baspasóz qyzmeti taratqan aqparatta.
