Qazaqstan Qytaıǵa shoshqa etin eksporttaıdy
ASTANA. KAZINFORM – Shanhaı qalasynda (QHR) QR Aýyl sharýashylyǵy mınıstrligi men QHR Bas keden basqarmasy Qazaqstannan Qytaıǵa eksporttalatyn shoshqa etine qoıylatyn ınspektsııa, karantın jáne qaýipsizdik talaptaryn retteıtin hattamaǵa qol qoıdy.
Bul — mańyzdy qadam, sebebi buǵan deıin Qazaqstannyń shoshqa eti Qytaı naryǵyna jetkizilmegen, jáne birde-bir qazaqstandyq kásiporyn QHR-ǵa shoshqa etin eksporttaýǵa ruqsat almaǵan edi. Hattama shoshqa etin jetkizýdiń jańa múmkindikterin ashady, ıaǵnı, tek muzdatylǵan jáne salqyndatylǵan et qana emes, sonymen qatar sýbónimder men termııalyq óńdelgen ónimder de qamtylatyn bolady. Qujatqa qol qoıý ekijaqty saýda qatynastaryn damytýdyń jańa belesin ashyp, Qazaqstannyń shoshqa sharýashylyǵy men qaıta óńdeý ónerkásibin nyǵaıtýǵa yqpal etpek.
Eksport kóleminiń ulǵaıýy kásiporyndardyń óndiristik qýatyn arttyrýǵa jáne aýyldyq óńirlerdiń damýyna serpin beredi.
— Bul hattama — Qazaqstan men Qytaı arasyndaǵy ekonomıkalyq jáne saýda baılanystaryn damytý, sondaı-aq qazaqstandyq aýyl sharýashylyǵy ónimderin halyqaralyq naryqtarda keńinen tanytý jolyndaǵy mańyzdy qadam, — dep atap ótti Aýyl sharýashylyǵy mınıstri Aıdarbek Saparov.
Aýyl sharýashylyǵy mınıstrligi men QHR Bas keden basqarmasy ónimniń sapasy men qaýipsizdigine qatysty joǵary halyqaralyq standarttarǵa sáıkestigin qamtamasyz etý maqsatynda yntymaqtastyqty nyǵaıtýǵa ýaǵdalasty. Ásirese, ınspektsııa jáne karantın máselelerine erekshe nazar aýdarylatyn bolady.
Aıta ketelik BUU Azyq-túlik jáne aýyl sharýashylyǵy uıymynda «Qazaqstan» bólmesi ashyldy.