Qazaqstan-Qytaı shekarasyndaǵy kólik-logıstıka máseleleri qaraldy
ASTANA. KAZINFORM — Elordada Qazaqstan-Qytaı shekarasyndaǵy kólik-logıstıka máseleleri talqylandy.
«Atameken» Ulttyq kásipkerler palatasy uıymdastyrǵan sharanyń basty taqyryby — avtomobıl ótkizý beketterindegi CarGoRuqsat elektrondy kezek júıesiniń jumys isteýi, sondaı-aq ony jetildirý boıynsha usynystardy talqylaý.
Sala ókilderiniń málimetinshe, aǵymdaǵy jyldyń basynan beri palataǵa tasymaldaýshylar men logıstıkalyq kompanııalardan memlekettik shekaradaǵy qıyndyqtar týraly suraqtar kóbeıgen. Ondaǵy negizi máselelerge — tómen ótkizý qabileti, tehnıkalyq aqaýlar, júıe jumysynyń ashyqtyǵy jatady. Bul qıyndyqtar bıznes múddelerine ǵana emes, sonymen qatar ekonomıkalyq qaýipsizdikke, qazaqstandyq tasymaldaýshylardyń, eksporttaýshylardyń básekege qabilettiligine jáne eldiń tranzıttik áleýetine tikeleı áser etedi.
Jıynǵa memlekettik organdar, óńirlik palatalar, salalyq qaýymdastyqtar men kólik kompanııalarynyń ókilderi qatysty.
Sharaǵa qatysýshylar «Nur Joly» jáne «Dostyq» ótkizý beketterindegi kezek máselesi, ótkizý qabiletiniń shekteýleri, eksporttyq júktiń basymdyqsyz ótkizilýi, paıdalanylmaǵan slottardy qaıta bólý jáne qytaılyq tarappen jedel úılestirý qajettiligi sııaqty máselelerdi talqylady.
— Qoldanystaǵy júıeniń birqatar kemshiligi aıqyndalyp otyr. Naqty mysal, Qytaı shekarasyndaǵy kezekti brondaǵan tasymaldaýshy basqa memlekettik shekara arqyly Reseı nemese Ózbekstan jaǵyna ótetin bolsa, kezek alý múmkindigi shekteledi. Sonymen birge birqatar memlekettik shekaradaǵy avtomobıl ótkizý beketterindegi kólik quraldaryn ótkizý qablettiligi tómen ekendigi baıqaldy. Osyǵan oraı búgin «Atameken» Ulttyq kásipkerler palatasynda múddeli memlekettik organdardyń qatysýymen, bıznes ókilderiniń qatysýymen ortaq mámilege kelý maqsatynda jıyn uıymdastyryp otyrmyz, — deıdi «Atameken» Ulttyq kásipkerler palatasy logıstıka jane tasymaldaý departamenti dırektorynyń orynbasary Qýanysh Ermuhanov.
Ol sonymen birge bul máselelerdi sheshýdegi óz usynystaryn ortaǵa saldy.
— Paralleldi brondaý mehanızmin qarastyrý nemese buryn berilgen brondy toqtata turý, jalpy brondaý slottar sanyn kóbeıtý, bul ótkizý beketteriniń qabilettiligine qaraı bólinedi. Mysaly, búgingi tańda «Nur Joly» beketinde táýligine 550 avtokólik quraly ótetin bolsa, bul sandy 1000 nan asyrýǵa usynys beremiz — deıdi ol.
Eske salaıyq, búgin Prezıdent Qaýipsizdik Keńesiniń otyrysynda kólik salasyndaǵy kemshilikter úshin Marat Qarabaevqa sógis jarııalady.