Qazaqstan qaı elderge dári-dármek ótkizip otyr
ALMATY. KAZINFORM — Byltyr eldegi farmatsevtıkalyq óndiris kólemi 21,8% ósip, 171,6 mlrd teńgege jetti. Atalǵan salaǵa tartylǵan ınvestıtsııa 2 ese ulǵaıyp, 91,3 mln dollar boldy. Bul týraly Densaýlyq saqtaý mınıstrliginiń Kazinform saýalyna joldaǵan jaýabynda aıtylǵan.
Ulttyq statıstıka bıýrosynyń derekterine sáıkes, 2024 jyly farmatsevtıka óniminiń eksporty 27 874,34 myń AQSh dollaryna jetken.
Negizinen Resseı, Ózbekstan, Qyrǵyzstan, Slovenııa, Túrikmenstan, Mońǵolııa, Grýzııa, Moldova, Ýkraına jáne Tájikstan elderine eksporttaldy.
Qazaqstanda farmatsevtıkalyq óndirýshilerdiń sany — 207, onyń ishinde 43-i dárilik zattardy óndirýge mamandanǵan. 164-i medıtsınalyq buıymdar shyǵarady.
25 otandyq óndirýshiniń GMP sertıfıkaty bar.
Memleket basshysynyń otandyq óndiristiń úlesin farmatsevtıkalyq naryqta 50%-ǵa deıin jetkizý tapsyrmasy oryndaý maqsatynda Densaýlyq saqtaý mınıstrligi birqatar sharany qolǵa aldy.
Atap aıtar bolsaq, mysaly:
— dárilik zattar men medıtsınalyq buıymdar nomenklatýrasyn qalyptastyrý jónindegi tásilderdi ózgertý, bul densaýlyq saqtaý júıesiniń naqty qajettiligine qaraı dárilik zattar men medıtsınalyq buıymdar shyǵarý jónindegi jańa óndiristerdi ulǵaıtýǵa múmkindik beredi;
— farmatsevtıka ónerkásibin R&D damytý jáne trenıng ortalyqtary arqyly joǵary tehnologııalyq, ınnovatsııalyq dárilik zattar, medıtsınalyq buıymdar óndirisine baǵdarlaý qajet;
— dárilik zattar men medıtsınalyq buıymdar óndirisiniń tolyq tsıkli úshin jaǵdaılar jasaý jáne tikeleı ınvestıtsııalar tartý úshin óndiriletin ónimniń ózindik qunyn tómendetý maqsatynda dárilik zattardyń jáne medıtsınalyq buıymdar jetkizýdiń uzaq merzimdi sharttaryn jasasý merzimderi bóliginde (óndiristiń tolyq tsıkli kezinde 10 jylǵa deıin jáne óndiristiń tolyq emes tsıkli kezinde 5 jylǵa deıin)ózgertý usynylady;
— otandyq jáne sheteldik óndirýshi birlesip júrgizetin klınıkalyq synaqtardy yntalandyrý, bul rette ınnovatsııalyq preparatqa lıtsenzııa qazaqstandyq áriptesinde qalady.
— Usynylyp otyrǵan sharalardy iske asyrý Qazaqstan aýmaǵynda óndiristerdi oqshaýlaý deńgeıiniń ósýine yqpal etedi, otandyq ónimniń sapasyn arttyrýdy, tehnologııalar transferti men jańa ázirlemelerdi eskere otyryp, onyń assortımentin keńeıtýdi jáne quramdas teorııalyq ónimdilik (QTÓ) úlesiniń 50% boıynsha nysanaly ındıkatorǵa qol jetkizýdi qamtamasyz etedi, — delingen mınıstrlik jaýabynda.
Aıta keteıik, Qazaqstan Slovenııanyń farmatsevtıka kompanııasymen birlesken kásiporyn qurýy múmkin.
Sondaı-aq «Fıtohımııa» ǵylymı-óndiristik ortalyǵynyń qurylǵanyna 30 jyl tolǵanyn jazǵanbyz.