Qazaqstan qartaıý júrip jatqan elder qataryna enýi múmkin

ASTANA. QazAqparat - Eki jyldan keıin Qazaqstan turǵyndary arasynda qartaıý úrdisi bastalǵan elderdiń qataryna enýi múmkin. Bul týraly búgin «Biryńǵaı jınaqtaýshy zeınetaqy qory» basshylyǵymen ótken kezdesýde Senat depýtaty Birǵanym Áıtimova málim etti, dep habarlaıdy QazAqparat tilshisi.

«Bizdiń sarapshylar Qazaqstandaǵy qartaıý úrdisine alańdaýly. BUU jikteýine sáıkes, eger de 65 jastaǵy jáne odan joǵary jastaǵy azamattar sany 7 paıyzdy qurasa, onda bul qoǵam qartaıyp kele jatqanyn bildiredi», - dedi B. Áıtimova.

Osy oraıda depýtat bul másele búginde eýropalyq elderde óte ózekti bolyp otyrǵandyǵyn sóz etti.

«Búginde Qazaqstanda osy sanatqa kiretin egde jastaǵy adamdardyń úlesi 6,6 paıyzdy qurap otyr. 2020 jyldyń sońyna qaraı bul kórsetish 7 paıyzdan asyp, 7,4 paıyzǵa jetýi múmkin. Atap aıtqanda, birneshe jyldan keıin elimiz halyqtyń qartaıý protsesi oryn alǵan birqatar eýropalyq memleketter qataryna enýi yqtımal», - dedi Birǵanym Áıtimova.

Budan buryn habarlanǵandaı, Qazaqstanda zeınetaqy jınaqtary boıynsha erlerdiń úlesi basym.

Sonymen qatar, N. Naýryzbaeva bıylǵy shildeniń basynda qazaqstandyqtardyń zeınetaqy jınaqtarynyń kólemi 8,4 trln teńgege jetkenin aıtty.