Qazaqstan qalalarynda uıaly telefon quny qansha
ASTANA. KAZINFORM - Uıaly telefon adamnyń ajyramas baılanys quralyna aınaldy. Qazirgi kezde onyń quny elimizde shamalas. Alaıda belgili bir túriniń baǵasy keı óńirde tómen, keıbirinde joǵary. Kazinform agenttiginiń tilshisi naryqty baǵamdap, smartfon baǵasyn salystyrdy.
Qazaqstan qalalarynda kópke tanymal uıaly telefon qunyn salystyrý úshin aldyn ala qoljetimdisin, quny ortasha jáne qymbatyn tańdap aldyq. Apple (iPhone 11, iPhone 15 jáne iPhone 16 Pro) jáne Android júıesindegi (OPPO A3, Xiaomi Redmi Note 14 jáne Samsung Galaxy S25 5G) telefon jady 256 GB tańdaldy.
Megapolısterden shalǵaı jatqan óńirlerde baǵanyń árqıly ekenin kórýge bolady. Tipti qymbat modeliniń aıyrmashylyǵy 200 myń teńgege deıin jetedi. Al qoljetimdi smartfon baǵasynda asa úlken aıyrmashylyq joq, bar bolsa da 20 - 30 myń teńgeden ári aspaıdy.
Android operatsııalyq júıesinde jumys isteıtin uıaly telefon kóp taralǵan jáne baǵasy turaqty. Al iPhone Qazaqstan qalalarynda keń taralǵanymen, baǵa alshaqtyǵy tirkeldi.
Qyzylordada smartfon baǵasy joǵary. Munda iPhone 11 baǵasy shamamen 160 myń teńge. Al buryn paıdalanylǵany 120 myń teńge bolyp tur.
Al Xiaomi Redmi Note 14 sekildi ortasha deńgeıli uıaly telefon quny ózge óńirlerge uqsas. Android júıesinde jumys isteıtin telefon quny ortasha bolsa, iPhone 16 Pro quny rekordtyq kórsetkishke jetip, 834 myń teńge bolyp tur. Al ózge óńirlerde baǵa shamamen - 700 myń teńge.
Astana qalasynyń ózinde baǵa mundaı joǵary emes. iPhone 16 Pro baǵasy 775 myń teńge, ózge model baǵasy elimizdegi ortasha baǵaǵa shamalas. Al Samsung quny jeńildikpen shamamen 454 myń teńge, ózge óńirde onyń baǵasy 574 teńge.
Shymkentte iPhone 11 baǵasy qymbat bolyp shyqty. Quny — 269 teńge. Elimizde bul telefonnyń baǵasy shamamen 160 myń teńge. Al Apple baǵasy ortasha kórsetkishten sál tómen. Quny — 639 teńge.
Qonaevta buryn qoldanysta bolǵan iPhone 11 baǵasy 95 myń teńgeden bastalady. Jańasyn tabý qazir qıyn, tabylsa shamamen 160 myń teńgege satylady. iPhone 16 Pro smartfony munda — 670-750 teńge. Samsung Galaxy S25 5G uıaly telefonyna jeńildik jasalyp, 100 myń teńgege arzandady.
Qostanaıda iPhone 11 telefonynyń jańasyn tabý qıyn. Qoldanylǵany 125 myń teńgege satylyp jatyr. iPhone 15 munda ortasha baǵadan 30 myń teńgege qymbat.
Óskemen men Semeıde iPhone 15 edáýir arzan. Quny — 460 teńge. Android júıesinde jumys isteıtin telefonnyń ortasha baǵasy shamamen 110 myń teńge. Al Xiaomi Redmi Note 14 quny ózge óńirlerge qaraǵanda 10-15 myń teńgege qymbat.
Almatyda smartfon quny ózgemen salystyrǵanda turaqty. Munda básekelestik joǵary jáne logıstıkasy óte tıimdi. Tek iPhone 11 telefony qymbat. Baǵasy 199 myń teńgeden bastalady.
Aqtóbede iPhone 11 quny ózge óńirlerge qaraǵanda sál joǵary. Qazir quny — 164 teńge. Al buryn qoldanysta bolǵany 110 myń teńge. iPhone 15 telefonyn keıbir adamdar 300 - 400 myń teńgege satyp jatyr. Dúkendegi baǵasy - 530 myń teńge.
Qaraǵandy, Taldyqorǵan men Túrkistanda iPhone 11 smartfonyn 150-165 myń teńgege satyp alýǵa bolady. Redmi Note 14 telefony bolsa 500-550 myń teńge. Al iPhone 16 Pro quny ózge óńirlerge qaraǵanda arzan.
Petropavl, Jezqazǵan men Kókshetaýda smartfon quny elimizdegi ortasha baǵadan tómen. Buryn qoldanǵan iPhone 11 baǵasy 130 myń teńgeden bastalady. Kókshetaý bul modeldi taba almaısyz. Aqmola oblysynda Xiaomi Redmi Note 14 baǵasy ózge oblysqa qaraǵanda 20 myń, Petropavlda 50 myń teńgege arzan. Kókshetaýda Samsung S25 5G smartfony ózge óńirge qaraǵan 20-30 myń teńgege arzan.
Taraz ben Aqtaýda iPhone 11 telefonynyń eskisin 90-100 myń teńgege satyp alýǵa bolady. Al jańasyn 160-170 myń teńgege satyp jatyr. Munda iPhone baǵasy ózge óńirlerge qaraǵanda qoljetimdi. Qazir iPhone 16 PRO baǵasy 650 myń teńgeden bastalyp tur. Android júıesinde jumys isteıtin telefon quny elimizdegi ortasha baǵadan tómen.
Atyraý men Pavlodarda ustalǵan telefon kóp satylady. Munda baǵa dúkenge qaraǵanda - 30-40% tómen. Pavlodarda iPhone 16 Pro baǵasy elimiz boıynsha eń arzan. Bul telefon quny 589 myń teńge, al OPPO A3 baǵasy 97 myń teńge.
Qazirgi kezde Oral qalasynda uıaly telefon baǵasy ózge óńirge qaraǵanda tómen. iPhone 15 telefonynyń quny 100 myń teńgege deıin arzan. OPPO A3 quny — 95 myń teńge. iPhone 11 telefonynyń jańasyn tabý qıyn, tabylsa baǵasy joǵary. Quny - 193 myń teńge. Samsung S25 5G telefonyna jeńildik jasalyp, 480 myń teńge bolyp tur. Keıde 400 myń teńgege deıin arzandaıdy.
Buǵan deıin qysqy jyly aıaq kıim jáne úı ınternetiniń baǵasy týraly jazyldy.
