Qazaqstan qalalarynda nan baǵasy qansha
ASTANA. KAZINFORM – Qazaqstanda suranysqa ıe jáne qoljetimdi taǵymnyń biri – nan. Alaıda nan baǵasy óńirlerde ártúrli. Biz bólke men tandyr nannyń qaı óńirde qymbat, qaısysynda arzan ekenin bildik, dep habarlaıdy Kazinform agenttiginiń tilshisi.
Qazaqstannyń keıbir qalasynda nan men tandyr nan baǵasy arasyndaǵy aıyrmashylyq tórt esege jetken. Nan baǵasy Qyzylorda men Aqtóbe qalasynda tómen. Munda bólke baǵasy keı jerlerde 90-110 teńge aralyǵynda. Al Pavlodar, Óskemen, Semeı qalalarynda baǵa 220-260 teńgege deıin jetedi.
Elimiz boıynsha nan baǵasy ońtústik jáne batys óńirlerinde tómen. Qyzylordada surypyna qaraı nan baǵasy 90-120 teńgege satylyp jatyr. Al Aqtaýda 105, Aqtóbede 106-110, Túrkistan men Atyraýda 110-120 teńge aralyǵynda. Taraz tutynýshylary nandy 130-140 teńgege satyp ala alady.
Al elimizdiń soltústigi men shyǵysyndaǵy óńirlerde baǵa joǵary.
Almatyda nan baǵasy 165 teńge bolsa, Qonaev pen Taldyqorǵanda 160 teńge, Astanada 170 teńge shamasynda. Kókshetaýda baǵa 200 teńge, Qostanaıda 206 teńge, Semeıde 218 teńge, Óskemende 220 teńge. Elimiz boıynsha eń joǵary baǵa Pavlodar qalasynda. Munda baǵa 230-260 teńge aralyǵynda. Al Qaraǵandy men Jezqazǵandaǵy baǵa 130 teńgeden bastalyp, surpy men sapasyna qaraı 380 teńgege deıin jetedi.
Tandyr nan baǵasynda da aıyrmashylyq joǵary. Máselen, Túrkistan men Aqtaýda tandyr nandy 120 teńgege, Qyzylordada 150 teńgege, Aqtóbede 180-200 teńgege satyp alýǵa bolady. Al Astanada tandyr nan baǵasy shamamen 200 teńge, Almatyda 230 teńge, Pavlodarda 220 teńge.
Tandyr nan baǵasy Atyraý qalasynda 250-300 teńge, Taldyqorǵanda 160-320 teńge bolsa, Qaraǵandy men Jezqazǵanda 150-300 teńge aralyǵynda. Petropavl men Qostanaıda baǵa – 324-360 teńge. Oralda baǵa aıyrmashylyǵy joǵary. 100 teńgeden bastalyp, 400 teńgege jetedi. Semeı men Óskemende tandyr nandy 280 teńgege satyp alýǵa bolady.
Sonymen nan, tandyr nan baǵasy elimizdiń ońtústigi men batysynda arzan bolsa, shyǵys pen soltústikte baǵa joǵary. Sonyń ishinde tandyr nan baǵasy kólemi men quramy, satý ornyna qaraı ózgerip otyrady.
Buǵan deıin Qazaqstan qalalaryndaǵy taýyq etiniń baǵasy týraly jazyldy.