Qazaqstan qalalarynda kartop baǵasy qansha turady
Qazaqstanda kartop baǵasyna qatysty shý áli de basylmaı tur. Kazinform agenttiginiń tilshisi áleýmettik mańyzy bar taýardyń dúken sórelerindegi baǵasy qansha ekenin anyqtap bildi.
2025 jyldyń qańtar aıynda keıbir saýda núktelerinde kartop baǵasy eki-úsh ese kóterilip ketti. Jergilikti atqarýshy bılik aralasqan soń keıbir aımaqta baǵa sál tómendedi.
Elimiz boıynsha Petropavlda kartop baǵasy tómen. Munda kelisi 250 teńgeden bastalady. Al Pavlodarda baǵa 250-370 teńge aralyǵynda. Kókshetaýda kartop kelisiniń quny 260-300 teńge turady. Al Qostanaıda baǵa 290-364 teńge.
Ári qaraı Semeı qalasy tur. Munda bir keli kartop baǵasy 320-380 teńge. Oralda kartoptyń kelisi 310 teńge turady.
Túrkistan qalasyndaǵy bazarlar men dúkenderde kartoptiń kelisi 320-400 teńge dep kórsetilgen.
Qonaev sýpermarketterinen kartoptyń kelisin 329 teńge satyp alýǵa bolady. Al bazarda 400 teńge turady.
Qaraǵandylyqtar kartoptyń kelisin 329 teńgege satyp alady. Al Atyraý tutynýshylary úshin kartoptyń kelisi 340 teńgeden bastalady.
Aqtaýda kartop baǵasy 350 teńgeden bastalady. Al Aqtóbe dúkenderi men sýpermarketterinde kartop kelisi 360-390 teńge turady.
Qyzylordadaǵy dúkenderde kartoptyń kelisi 380-400 teńge bolyp tur.
Al Óskemen, Taldyqorǵan, Jezqazǵan men Tarazda baǵa 400 teńgeden bastalady.
Shymkent, Astana men Almatyda kartop baǵasy ózge qalalarǵa qaraǵanda joǵary. Shymkent dúkenderinde kartoptyń kelisi 490 teńge turady. Al bazardaǵy baǵa - 340-400 teńge. Astanalyqtar kartoptyń kelisin 495-510 teńgege satyp alady. Al bazarda 300 teńgeden de bar. Almaty dúkenderinde kartoptyń kelisi 500 teńgeden bastalady. Bazardan 350-400 teńgege satyp alýǵa múmkindik bar.
Kartopty tómen baǵada da satyp alýǵa bolady. Kókónistiń bul túri áleýmettik taýarlar tiziminde bolǵan soń ár óńirdiń turaqtandyrý qorynda saqtalady. Mundaı kartop sýpermarketten, keı óńirde áleýmettik dúkenderden tabylady. Alaıda elimizde bul jerlerdegi ónim baǵasy da árkelki. Kartop quny 100-330 teńge aralyǵynda.
Eske salsaq, elimiz boıynsha aldymen Aqtóbe oblysynda kartop baǵasy birden 100 teńgege qymbattady.
Keıin Saýda mınıstrligi men Aýyl sharýashylyǵy mınıstrligi baǵanyń ósý sebebin túsindirdi.
Kazinform buǵan deıin ýyldyryq, qazy, tort, aıran, qaraqumyq pen kúrish, irimshik pen shujyq, bal men qurma baǵasyn salystyryp kórdi.