Qazaqstan qalalarynda býhgalter qyzmetiniń quny qansha
ASTANA. KAZINFORM – Salyq esebin tapsyrar kezde esepshilerge degen suranystyń artýy zańdylyq. Baǵa kóbine mamannyń biliktiligine, jumys aýqymyna baılanysty ózgerip otyrady. Degenmen naryqtaǵy ortasha baǵany bilý, salystyrý qıyn emes, dep habarlaıdy Kazinform agenttiginiń tilshisi.
Aqpan aıynyń ortasynan bastap bıznes ıeleri úshin jaýapty kezeń bastalady. Kásipkerler jyldy qorytyndylap, qujattardy rettep, táýekeldi baǵamdap, salyq esebin tapsyrady. ıAǵnı 15 aqpannan bastap kásipkerlik sýbektileriniń jumysy qyzady.
Tájirıbesi mol kásipkerdiń ózi de keıde salyq esebinen jańylysyp, zańnamadaǵy ózgertýler men tolyqtyrýlardy tolyq oryndaýǵa qınalady. Al esepshi birinde bar, ekinshisi bolsa dál osy shaqta arnaıy mamandar kómegine júginedi. Jeke kásipkerler men shaǵyn JShS ıeleri keıde ekinshi tásildi qoldanady. Olar jyldyq salyq esebi kezinde esepshilerdiń qyzmetine júginedi. Sondyqtan bolar, qazirgi kezde naryqta esepshilerge degen suranys artyp tur.
Elimiz boıynsha Almaty jáne Astana qalalarynda qyzmettiń bul túri qymbat. Іri megapolısterde jeke kásipkerlerge keńes berý qyzmeti 10 myń teńge bolsa, JSSh-iniń esebin tapsyrý jolyn kórsetý quny 30 myń teńgeden bastalady. Baǵaǵa esepshiniń tájirıbesi men kompanııanyń bedeli áser etedi. Bul kezde jeke kásipkerlerge arnalǵan baǵa 25 myń teńgege, JShS-ne arnalǵan qyzmet quny 50 myń teńgege deıin jetýi múmkin.
Básekelestik joǵary bolǵan kezde býhgalterlik qyzmet usynatyn kompanııalar tegin keńes beredi. Bul kelýshiler qataryn arttyryp, tapsyrys berýshilerdi tartýǵa septigin tıgizip jatady. Taǵy bir tıimdi nusqa bar. Aı saıynǵy abonenttik tólem. Bul shaqta jyldyq salyq esebi kezinde ǵana emes, kez kelgen ýaqytta keńes alýǵa, qosymsha kelisimsharttarda maman kómegine júginýge bolady.
Shymkent qalasynda keńes alý qyzmeti jumystyń aýqymyna qaraı ártúrli bolady. Jeke kásipkerlerden orta eseppen 10 myń teńge, JShS-nen 20 myńnan bastap 40 myń teńgege deıin suraıdy. Tipti saǵatyna 10 myń teńge alatyn esepshiler de bar. Qostanaı qalasynda JK úshin 10 myń teńge, JShS-ine 30 myń teńge. Tek keńes berý kezinde ǵana emes, salyq esebin tapsyrý qyzmetine de dál osyndaı aqy suraıdy. Eger klıent birneshe qujat júktese, qyzmet quny shamamen 5-15 myń teńgege arzanǵa túsedi.
Pavlodar qalasyndaǵy qyzmet quny osy shamalas. Munda jeke kásipkerlerge keńes berý quny 7-20 myń teńge, al JShS-ine arnalǵan qyzmet kórset baǵasy 15-30 myń teńge aralyǵynda. Óskemen qalasynda jeke kásipkerler 5 myń teńge tólep, keńes ala alady. Alaıda kóbindegi qyzmet quny 20 myń teńge. Al JShS-niń ıelerine arnalǵan baǵa 10-30 myń teńge.
Elimiz boıynsha kóp qalada esepshi qyzmetiniń quny tómen. Máselen, Aqtóbe qalasynda jeke kásipkerge keńes berý quny 5-20 teńge, JShS-ne arnalǵan qyzmet 10-25 myń teńge. Bilikti esepshiler óz qyzmeti úshin jeke kásipkerlerden 20 myń teńge, al JShS-nen 50 myń teńge alady.
Atyraý qalasynda baǵa ornyqty. Munda orta eseppen jeke kásipkerler 5-15 myń teńge, al JShS-i 10-30 myń teńge tóleıdi. Jezqazǵan men Qaraǵandy qalalarynda baǵa birdeı. Munda jeke kásipkerlerge keńes berý qyzmeti 5-15 myń teńge, al naqty baǵyt-baǵdar berý 25 myń teńge bolady. JShS ıeleri bolsa 5-20 myń teńge, uǵynyqty etip túsindirse 20-40 myń teńge tóleıdi.
Qonaev qalasynyń jeke kásipkerleri bir rettik keńes alý úshin 5-15 myń teńge turatyn qyzmetke júginedi. Al eger salyq esebi aldynda qujatty taǵy bir qaratyp alsa, baǵa tórt ese ósedi. JShS ıeleri 10-30 myń teńge tólep, keńes ala alady.
Aqtaý qalasynda JK keńes alýy úshin 5 myń teńge tóleıdi. Naryqta óz qyzmetin 20 myń teńgege baǵalaıtyn esepshiler de bar. Al JShS ıelerine arnalǵan keńes alý qyzmetiniń quny – 10-20 myń teńge. Taldyqorǵanda JK esepshiden keńes alsa 6-8 myń teńge tóleıdi. Elimiz boıynsha eń tómeni osy. Al JShS bul qyzmet shamamen 15-30 myń teńgege shyǵady. Semeı qalasynyń jeke kásipkerleri keńes alý kezinde 5-15 myń teńge tóleıdi. Keı kompanııalarda qyzmet quny 20 myń teńge. Al JShS-i ıelerine 10-30 myń teńge qajet.
Baǵa Qyzylorda, Petropavl jáne Taraz qalalarynda qoljetimdi. Bul qalalardaǵy jeke kásipkerler esepshi keńesiniń qyzmetine 5-10 myń, JShS ıeleri 10-20 myń teńge tóleıdi. Petropavldaǵy býhgalterlik kompanııalar kásiporyn tabysynyń aınalymy, jumysshy sany men qujat kólemine qaraı baǵany ózgertip otyrady. Tarazda keıbir esepshiler aldymen tegin keńes beredi. Qashyqtan kórsetiletin qyzmetke, sonyń ishinde beınebaılanys pen telefon arqyly túsindirýge az aqy alady.
Kókshetaý qalasynda jeke kásipkerler 5 myń teńge, JShS ıeleri shamamen 10-15 myń teńge tóleıdi. Túrkistanda elimiz boıynsha baǵa tómen. Jeke kásipkerlerge bir ret keńes berý aqysy 4 myń teńgeden bastalady. Kóbinde bul qyzmet quny 10 myń teńge bolyp tur. Al JShS ıeleri 6 myń teńgelik keńes berý qyzmetin de taba alady. Negizi kóbinde baǵa 15 myńnan ári aspaıdy.
Elimiz boıynsha bul qyzmet túri Oral qalasynda tómen bolyp shyqty. Munda jeke kásipkerler keıde 2 myń teńge tólep, keńes ala alady. Al JShS ıeleri bolsa 3 myń teńge beredi. Alaıda esepshiler kompanııasynyń kóbi bul eki qyzmetke de 10-15 myń teńge alady.
Aıta keteıik, buǵan deıin MRT jáne KT-ǵa túsý qyzmetiniń quny men planshet jáne noýtbýk baǵasyn bildik.