Qazaqstan Iranmen saýda aınalymyn 3 mıllıard dollarǵa jetkizýdi kózdeıdi - sheteldegi qazaq baspasózi
ASTANA. KAZINFORM - Kazinform HAA sheteldegi qazaq tilinde taraıtyn aqparat kózderine aptalyq sholýyn usynady
Eýropalyq Odaq – Ortalyq Azııa alǵashqy sammıti Ózbekstanda ótedi – ÓzA
Eýropa Keńesiniń Prezıdenti Antonıý Koshta men Eýropa Komıssııasynyń Prezıdenti Ýrsýla fon der Lıaıen 3-4 sáýir kúnderi Ózbekstanǵa resmı saparmen keledi.
Bul týraly Eýropalyq Odaqtyń Ózbekstandaǵy ókildiginiń habarlamasyna silteme jasap «ÓzA» aqparat agenttigi málimdedi.
Habarlamada Eýropalyq Odaq pen Ortalyq Azııa elderiniń alǵashqy sammıtine Ózbekstan Respýblıkasy basshylyq etetini aıtylǵan. Aýqymdy jıynǵa Qazaqstan, Qyrǵyzstan, Tájikstan jáne Túrikmenstan basshylary da qatysady.
Bul jıynda Eýropalyq Odaqtyń aımaqpen yntymaqtastyǵan keńeıtý múddelerin qorǵaý múmkindigi týraly aıtylady. Sondaı-aq qazirgi geosaıası ahýaldyń jedel ózgerýi, atap aıtqanda, Reseı – Ýkraına soǵysy, Aýǵanstandaǵy jaǵdaı Eýropalyq Odaq pen Ortalyq Azııa arasyndaǵy baılanystyń strategııalyq mańyzyn arttyrý máselesi qaralady.
- Eýropa Keńesiniń basshysy Antonıý Koshta qazirgi kezdegi álemdik turaqsyzdyq pen bólinýshilik jaǵdaıyna toqtalyp, Eýropalyq Odaq úshin beıbitshilik pen órkendeýdi qamtamasyz etýdiń jalǵyz joly – senimdi seriktestik ornatý ekenin aıtty, - dep jazady «ÓzA».
Sondaı-aq osy aptada «ÓzA»-da «Ózbekstan 2024 jyly 33 378 tonna shaı ımporttady» degen taqyryptaǵy aqparat jarııalandy.
Ózbekstan 2024 jyldyń qańtar-jeltoqsan aılarynda shetelden 50,6 mıllıon AQSh dollaryna teń 33 378 tonna shaı ımporttalǵan.
Bul týraly «ÓzA» aqparat agenttigi ÓR Statıstıka agenttigine silteme jasap habarlady.
Atap aıtqanda, Ózbekstan 2024 jyly eń kóp shaı ımporttaǵan elder Qytaı (26 806 tonna), Kenııa (1 651 tonna), Iran (1 271 tonna), Úndistan (965 tonna) jáne Reseı (578 tonna) qatarly elder.
Shyńjańnyń Tarbaǵataı aımaǵy qazaqstandyq týrısterdi ystyq yqylaspen qarsy aldy- «Halyq gazeti»
Qytaılyq BAQ-tyń málimetinshe, 11 aqpanda Qazaqstannyń Abaı oblysynan kelgen 39 týrıst Baqty keden beketi arqyly elge kirip, bıylǵy Tarbaǵataı aımaǵyndaǵy transshekaralyq týrıstik toptardyń birinshisi bolǵan.
Sol kúni Baqty keden beketiniń jańa ulttyq qaqpasynda Tarbaǵataı halqynyń ókilderi akkordeon oınap, áýezdi «Kórikti Tarbaǵataı» ánin shyrqap, alystan kelgen qonaqtardy ystyq yqylaspen qarsy alǵan.
«Halyq gazeti» basylymynyń keltirgen deregine súıensek, 11-14 aqpan aralyǵynda týrıstik top Sháýeshek qalasynyń akkordeon mádenı kórme zalyna, Tarbaǵataı aımaqtyq murajaıyna jáne basqa da oryndarǵa barǵan. Sonymen qatar jergilikti turǵyndar qaýymdastyǵyna baryp, tamasha dástúrli Qytaı mádenıetimen tanysqan.
- Byltyrdyń 6 jeltoqsanynda Baqty portynda adamdar aǵyny qaıta bastalǵannan beri Tarbaǵataı aımaǵynda kiretin tórt týrıstik baǵyt, sondaı-aq Alakól men Almatyǵa shyǵatyn bes týrıstik baǵyt iske qosyldy. Osy ýaqytqa deıin Baqty porty arqyly kirip-shyqqan týrıst sany 6000-ǵa jetken, - dep dep jazady qytaılyq BAQ.
Sonymen qatar osy aptada «Halyq gazeti» basylymynda «Qytaıdaǵy alǵashqy jasandy ıntellekt pedıatry resmı túrde «jumysqa shyqty»» degen aqparat jaryq kórdi.
13 aqpanda Beıjińdegi Ulttyq balalar medıtsınalyq ortalyǵy men Balalar aýrýhanasynyń konsýltatsııalyq ortalyǵynda jasandy ıntellekt boıynsha sarapshy pedıatr resmı túrde «jumysqa shyǵyp», 13 pedıatrııalyq sarapshymen birge kúrdeli jaǵdaılar boıynsha kópsalaly konsýltatsııany aıaqtady.
Qytaılyq BAQ-tyń Beıjiń balalar aýrýhanasynan alǵan aqparatyna sáıkes, bul eldegi jasandy ıntellektiniń alǵashqy pedıatry, ol kúrdeli jáne sırek kezdesetin aýrýlardy dıagnostıkalaýǵa jáne emdeýge kómektesedi dep kútilip otyr.
- Bul konsýltatsııanyń taqyryby 8 jasar bala boldy. Ol úsh apta boıy denesi tartylyp, dirildegen. Eki apta buryn onyń bas súıeginiń túbinen isik baıqaldy. Onyń sebebi kúrdeli bolǵandyqtan, ártúrli aýrýhana ártúrli dıagnoz ben emdeý amaldaryn usynǵan. Bul konsýltatsııada jasandy ıntellekt pedıatrlary jáne ártúrli bólimshelerdiń 13 tanymal sarapshysy óte dáıekti usynystar berdi, - dep jazady «Halyq gazeti».
Ulttyq Balalar medıtsınalyq ortalyǵynyń dırektory jáne Beıjiń Balalar aýrýhanasynyń dekany Nı Sınnyń aıtýynsha, ol Beıjiń Balalar aýrýhanasynyń 300-den astam tanymal pedıatrııalyq sarapshylarynyń klınıkalyq tájirıbesin jáne sarapshylardyń ondaǵan jyldar boıy joǵary sapaly medıtsınalyq jazbalaryn biriktiredi.
Qazaqstan Iranmen saýda aınalymyn 3 mıllıard dollarǵa jetkizýdi kózdeıdi - ParsToday
Qazaqstan Iranmen saýda aınalymyn 3 mıllıard dollarǵa jetkizýdi kózdeıdi, dep jazdy ParsToday aqparat agettigi.
ParsToday aqparat agenttiginiń habarlaýynsha, Qazaqstan Syrtqy ister mınıstriniń orynbasary Álibek Baqaev jeksenbi kúni keshke «Sháhıd Radjaı» portynyń ártúrli bólikterin aralap, Irannyń ońtústigindegi Hormozgan ákimshiliginiń ekonomıkalyq ister jónindegi úılestirýshisiniń orynbasarymen kezdesti. Ol kezdesýinde Shyǵys Azııanyń keıbir elderinde qazaqstandyq porttar men logıstıkalyq termınaldardyń bar ekenine toqtalǵan. Ol Qazaqstan Iranmen syrtqy saýdany 3 mıllıard dollarǵa jetkizýge talpynýda ekenin aıtqan.
Álibek Baqaev Iran men Qazaqstannyń teńiz saýdasyn damytýdaǵy strategııalyq róline toqtalyp, «Bizdiń elimiz «Sháhıd Radjaı» porty arqyly ashyq sýǵa shyǵýǵa umtylatyn tranzıttik el bolyp sanalady», degen.
Túrki áleminiń Syrtqy ister komıssııasynyń basshylary Ystanbulda bas qosty - TRT
Túrik álemi Syrtqy ister komıssııasynyń basshylary Ystanbulda basqosty.
Túrkııa Uly Ulttyq Májilisi Syrtqy ister komıtetiniń tóraǵasy Fýat Oktaı jıynnyń ashylýynda sóz sóılep, aımaqtyq jáne jahandyq máselelerge toqtalǵan.
Bul týraly osy aptada Túrkııa Radıo Televızııa portaly habarlady.
Sondaı-aq Túrki Memleketteri Uıymyna múshe elderdiń saýda kólemine nazar aýdarǵan Oktaı áleýeti joǵary saýda kólemin arttyrýǵa bolatynyna toqtaldy.
- Eki kúnge sozylatyn kezdesýlerde jahandyq jáne aımaqtyq jáne Túrki álemi men parlamenttik dıplomatııa máseleleri talqylanady, - dep jazdy túrkııalyq BAQ.