Qazaqstan IKAO-da resmı tirkeldi
MONREALЬ. KAZINFORM — Qazaqstan Respýblıkasynyń Halyqaralyq azamattyq avıatsııa uıymy (IKAO) janyndaǵy turaqty ókili Tımýr Tilegenov Monreal qalasyndaǵy IKAO shtab-páterinde osy halyqaralyq uıymnyń Bas hatshysy Hýan Karlos Salazarǵa senim gramotasyn tabystady.
Suhbat barysynda azamattyq avıatsııa salasyndaǵy yntymaqtastyqty damytýdyń ózekti máseleleri talqylandy.
Bas hatshy QR Prezıdenti Qasym-Jomart Toqaevqa Qazaqstannyń IKAO janyndaǵy Turaqty ókildigin ashý týraly sheshim qabyldaǵany úshin alǵysyn aıtyp, turaqty ókildi óz qyzmetine kirisýimen quttyqtady.
Hýan Karlos Salazar turaqty ókildiktiń qyzmeti Qazaqstan men osy Uıym arasyndaǵy strategııalyq seriktestiktiń ári qaraıǵy damýyna óz septigin tıgizetinine senim bildirdi.
Sonymen qatar Bas hatshy Qazaqstannyń halyqaralyq arenadaǵy jetistikteri men róline joǵary baǵa bere otyryp, álemniń barlyq memleketteri men halyqaralyq uıymdarmen jaqsy qarym-qatynastardy damytyp otyrǵan elimizdiń bedelin atap ótti.
«IKAO ushý qaýipsizdigi men avıatsııalyq qaýipsizdik deńgeıin joǵarylatý jónindegi Qazaqstan tarapy júrgizip otyrǵan reformalardy, sondaı-aq jalpy áýe kóliginiń qol jetimdiligin arttyrýyn joǵary baǵalap, olardy mysal retinde kórsetip otyrady», — dep atap ótti Hýan Karlos Salazar.
Turaqty ókil Qazaqstan basshylyǵynyń sálemin jetkize otyryp, elimizben azamattyq avıatsııa salasyndaǵy kópjosparly yqpaldastyqty damytý jónindegi IKAO-nyń qyzmetine qatysty qoldaýyn bildirdi.
«Qazaqstan IKAO-nyń belsendi qatysýshysy bolyp tabylady jáne elimizdiń tarıhynda tuńǵysh ret Turaqty ókildiktiń ashylýy Qazaqstannyń ushý qaýipsizdigi men avıatsııalyq qaýipsizdiktiń joǵary standarttaryn odan ári dáıekti túrde engizýine yqpal etetinine kámil senimdimin», — dedi T. Tilegenov.
Sonymen qatar ol Qazaqstannyń azamattyq avıatsııa salasynyń aǵymdaǵy jaǵdaıy, sondaı-aq elimizdiń osy saladaǵy negizgi basymdyqtary men mindetteri týraly baıandap berdi.
Kezdesý sońynda taraptar Qazaqstan men IKAO arasyndaǵy is júzindegi dıalogtyń odan ári keńeıýiniń beıildiligi men mańyzdylyǵyn rastady.
