«Qazaqstan halqyna» qory aýyr dertke shaldyqqan 130 naýqasty qymbat dárimen qamtamasyz etti
Qor 15,3 mıllıard teńgeden astam somaǵa sırek ári sozylmaly aýrýlary bar 130 naýqasty dárilik zattarmen qamtamasyz etti. Olardyń 118-i – orfandyq aýrýǵa shaldyqqan naýqastar.
Barlyǵy 20 túrli dári satyp alynǵan. Olardyń ishinde julyn bulshyqet atrofııasy bar balalarǵa qoldanylatyn álemdegi eń qymbat dárilik zat – «Zolgensma» («Onasemnogen abeparvovek») bar. Onkologııalyq jáne onkogematologııalyq derti bar patsıentterge, sondaı-aq Dıýshenniń bulshyqet dıstrofııasy, mýkovıstsıdoz, týa bitken lıpodıstrofııa, júıeli qyzyl jegi, ókpeniń lımfangıoleıomıomatozy, epılepsııanyń sırek jáne farmakorezıstentti túrleri, tuqym qýalaıtyn angıonevrotıkalyq isiný, jasóspirimderdiń ıdıopatııalyq artrıti, paroksızmaldy túngi gemoglobınýrııa aýrýy, atıpti gemolıtıkalyq-ýremııalyq sındrom sııaqty dıagnozdary bar emdelýshilerge arnalǵan dári-dármekter satyp alyndy.
Qor tarapynan qoldaý kórgen balalardyń biri – Taıra Muhtar. Neıroblastoma dıagnozy qoıylǵan balaǵa remıssııaǵa shyǵý úshin «Karzıba» («Dınýtýksımab beta») preparaty berilip, ımmýnoterapııa kýrsynan ótip jatyr. Dáriniń 1 qutysynyń baǵasy – 6 898 600 teńge. Taıranyń emdik kýrsy úshin 25 quty satyp alyndy. «Karzıba» – Qazaqstanda tirkelmegen, aýyr túrdegi neıroblastomany emdeýge arnalǵan qymbat dári.
«Ótken jyly 2 jasar qyzyma neıroblastoma dıagnozy qoıylǵanda, tıimdi emdeý júrgizý úshin «Karzıba» dárisimen ımmýnoterapııa kerektigin estidim. Ókinishke oraı, kepildendirilgen memlekettik medıtsınalyq kómek aıasynda bul preparat berilmeıdi. Mysaly, Reseıde osy dárini satyp alý úshin ata-analar 30 mıllıon rýbl jınaýǵa májbúr. Men de preparatty alý úshin jınaǵan múlikti satyp, qaryz alýǵa jáne qarajat jınaý úshin qor ashýǵa týra keletinine daıyndalyp júrdim. «Qazaqstan halqyna» qorynyń arqasynda qyzym 3 emdeý kýrsynan ótti, endi taǵy 2 kýrsy qaldy. Tolyǵymen saýyǵyp shyǵýǵa, ómir boıy remıssııaǵa shyǵýǵa múmkindik bar. Shetelge barýdyń, qor ashýdyń, balamyzdyń densaýlyǵy úshin únemi qorqynyshpen ómir súrýdiń qajeti joq. Qazir biz óz elimizde emdelip jatyrmyz, emdeý arasyndaǵy úziliste týystarymyzdyń janynda bolamyz. 3 jasar qyzymyz esh kúızelissiz, alańsyz ómir súrip jatyr», - deıdi Taıranyń anasy Tańsholpan Qurmanalıeva.
Orfandyq jáne aýyr syrqattardy emdeý dári-dármekterdiń joǵary qunymen erekshelenedi. Bul sırek dárilik zattardyń jetkizýshisin izdeý kúrdeli úrdis ári dári-dármek tek aldyn ala jiberilgen ótinimder boıynsha ǵana shyǵarylady. Dıstrıbıýtorlar preparattardyń az mólsherin jetkizýge múddeli emes.
Sonymen birge, orfandyq naýqastardy sábı kezinen bastap emdeýdiń zamanaýı ádisteri joǵary tıimdilikti kórsetedi.
Eske salsaq, «Qazaqstan halqyna» qory aýyr syrqattary bar naýqastardy elimizde tirkelmegen jáne Qazaqstandyq ulttyq dárilik formýlıarǵa, sondaı-aq ulttyq emdeý hattamalaryna engizilmegen dárilik zattarmen qamtamasyz etý mindettemesin alǵan. Búgingi tańda Qor jasalǵan kelisimsharttar nemese kelissózder júrgizý aıasynda 124 emdelýshini ómirlik mańyzdy preparattarmen qamtamasyz etý jumysyn jalǵastyryp jatyr.
