Qazaqstan halqynyń 20% jýyǵy temeki shegedi
Ulttyq statıstıka bıýrosy 2023 jyldyń shildesinde temekini tutyný boıynsha eresek turǵyndar arasynda jyl saıynǵy kezekti saýalnama júrgizdi, dep habarlaıdy QazAqparat.
Zertteý respýblıkanyń barlyq oblysynda, Astana, Almaty jáne Shymkent qalalarynda júrgizildi. Saýalnama suraqtaryna 15 jastan asqan 11 829 úı sharýashylyǵynyń bir múshesi jaýap berdi.
Nátıjesinde zerttelgen úı sharýashylyǵy músheleriniń jalpy sanynan qazirgi ýaqytta halyqtyń 19,4% (2022 jyly – 20,4%) nemese erlerdiń 36%, áıelderdiń 8,5% temeki tartady. Aýyldyq jerlerde temeki tartatyndardyń úlesi – 19,6%, qalalyq jerlerde – 19,3%. Temeki tartatyn halyqtyń jalpy sanynyń 92,3% ónerkásipte óndirilgen temekini tartady.
Temeki shegýshiler tarapynan úılerinde temeki tútinin jutatyn halyqtyń úlesi – 12,4%, onyń 11,8% – temeki tartpaıtyndar. Jumys ornynda temeki tútininiń áserine ushyraıtyndar úlesi – 7,6%, onyń 7,1% temeki tartpaıtyndar. Qoǵamdyq tamaqtaný oryndarynda saýalnamaǵa qatysqan respondentterdiń 12,3% temeki tútininiń áserine ushyraǵan, onyń 11,6% – temeki tartpaıtyndar.
Temeki ónimderin tutyný – qaterli aýrýlardy týdyrady dep esepteıtin respondentterdiń úlesi 86,7%, sonymen birge otbasy músheleriniń temeki ónimderin tutynýyna qarsy bolǵan respondentterdiń úlesi nebári 6,8%. Barlyq jerde temeki tartýǵa tolyq tyıym salatyn zańnamalyq bastamalardyń engizilýine saýalnamaǵa qatysqan respondentterdiń 71,8% qoldaý bildirdi.
2022 jylmen salystyrǵanda 2023 jyly temeki tartatyn respondentterdiń úlesi 29-38 jas toby ishinde ósti, qalǵan jas toptarynda kerisinshe tómendedi.
