Qazaqstan halqy assambleıasyna – 30 jyl

ASTANA. KAZINFORM - 1 naýryzda Qazaqstan halqy Assambleıasynyń qurylǵanyna 30 jyl tolady jáne Alǵys aıtý kúni atalyp ótedi. Bul uıym 1995 jyly elimizdegi etnosaralyq kelisim men tatýlyqty saqtaý men nyǵaıtý úshin qurylǵan edi.

Alǵashynda onyń mártebesi Prezıdent janyndaǵy konsýltatıvti-keńesshi organ bolyp bekitildi. Degenmen, assambleıa atalǵan mártebeden de myqty quqyqtyq negizi men qoǵamdyq-saıası mártebesi bar konstıtýtsııalyq organǵa deıin ósti. Memleket basshysy Assambleıa usynǵan Parlament Senatynyń 5 depýtatyn taǵaıyndaıdy. El aýmaǵynda myńnan astam etnomádenı birlestikter, Analar keńesi jáne Aqsaqaldar keńesi jumys isteıdi.

Odan bólek, Prezıdent tapsyrmasymen qurylǵan «Assambleıa jastary» birlestigi men Medıatsııa keńesi belsendi jumys isteıdi. Óńirlerde ashylǵan Dostyq úıleri de etnomádenı birlestikterdiń ǵana emes, jergilikti qaýymdastyqtyń, úkimettik emes uıymdar men jastardyń ortasyna aınaldy. Elimizdiń barlyq óńirlerinde QHA Jýrnalıster klýby jáne etnıkalyq BAQ jumys isteıdi.

Aqparat jáne mádenıet mınıstrliginiń málimdeýinshe, Assambleıanyń 30 jyldyǵyn merekeleý aıasynda elimizde jáne shetelde túrli formattaǵy 150-den astam is-shara uıymdastyrý jáne keminde 1,5 mln adamdy qamtý josparlanyp otyr.

Osyǵan deıin Qazaqstan halqy Assambleıasynyń 2026 jylǵa deıingi damý tujyrymdamasy ázirlengeni týraly habarlaǵan edik.