Qazaqstan halyqaralyq dıalog qaǵıdattaryn árqashan berik ustanady — Toqaev

ASTANA. KAZINFORM — Pákistannyń The News International gazetine suhbatynda Memleket basshysy Qasym-Jomart Toqaev Qazaqstannyń Ibrahım kelisimderine ne úshin qosylǵanyn aıtty. 

— Qazaqstan beıbitshilik, turaqtylyq jáne halyqaralyq dıalog qaǵıdattaryn árqashan berik ustanady. Bul ustanymnan aldaǵy ýaqytta da aınymaımyz. Prezıdent Donald Tramptyń ıdeıasymen júzege asqan Ibrahım kelisimderi, shyn máninde, bolashaqqa baǵdarlanǵan bastama. Osy kelisimge qosylý arqyly biz dıplomatııanyń kúshine senetinimizdi taǵy da rastadyq. Óıtkeni bul kez kelgen qarama-qaıshylyqty rettep, óńirde jáne jahanda uzaq merzimdi turaqtylyq ornatýǵa bolatyn parasatty qural. Qazaqstannyń Izraılmen qarym-qatynasy jaqsy. Sonymen qatar biz Palestına halqyn da qoldaımyz. Eki memlekettiń beıbit qatar ómir súrýine negizdelgen sheshimdi dáıekti túrde quptaımyz, — dedi Qasym-Jomart Toqaev.

Prezıdenttiń aıtýynsha, ulttyq múdde turǵysynan qarasaq, Ibrahım kelisimderine qosylý elimizge ınvestıtsııa men ozyq tehnologııalardy tartýǵa, basqa da qomaqty ekonomıkalyq ıgilikterge kenelýge berik negiz qalaıdy.

— Qazaqstannyń Ibrahım kelisimderine qosylýy arab pen evreı halyqtaryn qazirgiden de jaqyndastyryp, anaǵurlym keń musylman-ıahýdı dıalogyna ulasýǵa septigin tıgizedi dep úmittenemin, — dedi Memleket basshysy.

Budan buryn habarlanǵandaı, Prezıdent Qasym-Jomart Toqaev Pákistanǵa memlekettik saparmen bardy.