Qazaqstan Grýzııa portynda jańa termınaldyń qurylysyn bastaıdy
Grýzııanyń Qara teńiz jaǵalaýynda júrgiziletin atalǵan qurylyspen PTC Holding kompanııalarynyń qazaqstandyq kólik-logıstıkalyq ınvestıtsııalyq toby aınalysady. Osynyń nátıjesinde Transkaspıı halyqaralyq kólik marshrýty boıynsha júk tasymaly artady dep boljanýda.
«Bul Grýzııanyń iri porttarynyń birinde iske asyrylatyn Qazaqstannyń alǵashqy ınfraqurylymdyq jobasy. Ony iske asyrýdyń belsendi kezeńi bıyl qyrkúıekte bastalyp, qurylys jumystary qazan aıynda qolǵa alynady. Al nysandy 2024 jyly paıdalanýǵa berý josparlanǵan. Termınal 8 gektar aýmaqty alyp jatyr. Onyń jyldyq qýaty 80 myń konteınerge (20 fýttyq kólemde) deıin qabyldaýǵa qaýqarly bolady», - delingen mınıstrlik málimetinde.
Mınıstr M.Qarabaev Qazaqstan óziniń tranzıttik áleýetin keńeıtý úshin aýqymdy jumys atqarǵanyn jetkizdi.
«Lıanıýngan portynda Qazaqstan men Qytaıdyń birlesken logıstıkalyq ortalyǵy jáne QHR shekarasynda «Qorǵas – Shyǵys qaqpasy» qurǵaq porty syndy iri ınfraqurylymdyq jobalar iske asyryldy.
Kaspıı teńiziniń jaǵalaýynda Aqtaý jáne Quryq porttarynyń ınfraqurylymyn damytýǵa basymdyq berilip keledi.
«Batys Eýropa – Batys Qytaı» halyqaralyq tranzıttik dálizi jolǵa qoıyldy.
Qazir «Dostyq – Moıynty» temirjol ýchaskesinde uzyndyǵy 836 shaqyrym ekinshi temirjol toraby salynyp jatyr», - dedi mınıstr.
M.Qarabaevpen birge kapsýlany qalaý rásimine Grýzııanyń Ekonomıka jáne turaqty damý vıtse-premeri Levan Davıtashvılı, Qazaqstan Respýblıkasynyń Grýzııadaǵy Tótenshe jáne ókiletti elshisi Málik Myrzalın jáne PTC Holding-tiń basqarma tóraǵasy Tımýr Qarabaev qatysty.
«Qazir Grýzııa men Qazaqstannyń ekonomıkalyq yntymaqtastyǵy damýdyń jańa kezeńine qadam basym kele jatqanyn atap ótý mańyzdy. Buǵan 2022 jyly elder arasyndaǵy júk aınalymynyń 3 mln dollarǵa jetip, keıingi jyly 3esege artqany dálel. Bul turǵyda baılanysty tıimdi ári saýatty damytý úshin júk tasymalynyń logıstıkasy baǵytynda ınfraqurylymdy damytý qajet», - dedi L.Davıtashvılı.
