Qazaqstan ǵalymdary sý tasqynyn boljaý júıesin jáne agronom planshetin ázirledi
Elektrondyq resýrs sý tasqynyn monıtorıngilep, boljaýǵa múmkindik beredi. Júıe ınfraqurylym obektileriniń tsıfrlyq, koordınattyq jáne kartografııalyq derekterin qamtıdy.
«Shyǵys Qazaqstan oblysynda belgili bir kezeńde ózender arnasynan shyǵyp, kentter men turǵyn úılerdi sý basý qaýpi týyndaıdy. Sondyqtan bizdiń aldymyzda ózenderdegi sý deńgeıin baqylaý tıimdiligin arttyratyn jáne maýsymdyq sý tasqynyn boljaýǵa múmkindik beretin keshendi aqparattyq-taldaý júıesin ázirleý mindeti turdy. Ózen gıdravlıkasyn jáne yqtımal sý basý aımaqtaryn dál modeldeý úshin biz MIKE baǵdarlamalyq keshenin, sondaı-aq ArcGIS, QGIS, NextGIS zamanaýı geoaqparattyq júıelerin paıdalanamyz. Olar tótenshe jaǵdaıdy boljaý sapasyn jaqsartýǵa múmkindik beredi. Nátıjesinde biz sý tasqyny men eldi mekenderdi sý basýdyń aldyn alý úshin qajetti tolyq aqparat alamyz», — dep atap ótti ShQTÝ ǵalymy, PhD doktory Marjan Toǵyzova.
Sondaı-aq ýnıversıtet ǵalymdary agronomǵa arnalǵan planshet jasap shyǵardy. Tehnologııa agronomdarǵa aýylsharýashylyq alqaptaryndaǵy jaǵdaıdy baqylaýǵa múmkindik beredi, sonyń negizinde yqtımal táýekelderdi eskerip, ekonomıkalyq tıimdi sheshimder qabyldaýǵa bolady.
«Agronomǵa arnalǵan planshet» qosymshasy bul úıde de, dalada da jumys isteýge arnalǵan ámbebap qosymsha. Bul aýylsharýashylyq jumystarynda portatıvti elektronıkanyń artyqshylyqtaryn paıdalanýǵa múmkindik beredi. Órister tarıhy, kartalar, anyqtamalyqtar jáne basqa qujattardyń muraǵattarda saqtalýy mamandardyń sheshim qabyldaý protsesin jeńildetedi. Qosymshada sondaı-aq aýyl sharýashylyǵy alqaptarynyń jaı-kúıi týraly aqparat jáne egis jumystaryn odan ári josparlaý jónindegi usynymdar bar», — dedi tehnıka ǵylymdarynyń doktory Valentına Kolpakova.
