Qazaqstan ǵalymdary 3 jylda 81 halyqaralyq patent alǵan
ASTANA. KAZINFORM – Qazaqstandyqtardyń ónertabystaǵy belsendilik koeffıtsenti 45,77-ge jetken. Bul týraly Ǵylym jáne joǵary bilim mınıstrligi Kazinform saýalyna joldaǵan jaýabynda aıtylǵan.
«Statıstıkada eldiń ónertapqyshtyq belsendilik koeffıtsıenti patentteý vedomstvosyna berilgen ótinimderdiń 1 mln adamǵa shaqqandaǵy sany arqyly aıqyndalady», - dep jazylǵan mınıstrliktiń túsindirmesinde.
Ulttyq zııatkerlik menshik ınstıtýtynyń málimeti boıynsha, bul koeffıtsıent 2021 jyly – 41,28, 2022 jyly – 42,39, 2023 jyly – 45,77 bolǵan.
«Ulttyq zııatkerlik menshik ınstıtýtynyń jyldyq esebine sáıkes, Patent Cooperation Treaty tártibi boıynsha halyqaralyq patentke 2021 jyly 31 ótinim, 2022 jyly – 24 ótinim, 2023 jyly – 26 ótinim berildi. Eýrazııalyq patenttik konventsııa tártibi boıynsha 2021 jyly – 81 ótinim, 2022 jyly – 78 ótinim, 2023 jyly – 103 ótinim berildi», - delingen jaýapta.
Aıta ketý kerek, Patent Cooperation Treaty rásimi boıynsha bir halyqaralyq ótinim berý arqyly ótinim berýshi dúnıe júziniń kóptegen elderinde óz ónertabystaryn qorǵaýdy qamtamasyz ete alady.
Al Eýrazııalyq patenttik konventsııa jeke jáne zańdy tulǵalarǵa ózderiniń ónertabystary men ónerkásiptik úlgilerine ıelik etý quqyǵyn birtutas eýrazııalyq patent negizinde qorǵaýǵa múmkindik beredi.
Jalpy Qazaqstannyń ónerkásiptik menshik obektilerine 2021 jyly 12 761 qorǵaý qujaty, 2022 jyly 12 099 qujat, 2023 jyly 13 270 qujat berilgen.
