Qazaqstan fermerlerine astyq tapsyrý úderisi jeńildedi
«Astyq qolhattarynyń aınalymyn quqyqtyq retteýdi jetildirý maqsatynda «Astyq týraly» Zańǵa ózgerister men tolyqtyrýlar engizildi. Zańmen negizgi engizilgen jańalyqtarǵa toqtalsaq, astyq qolhattaryn qujatsyz, ıaǵnı elektrondy túrde shyǵarýǵa ótý jáne aqparattyq júıeni astyq naryǵynyń sýbektilerimen jumysta paıdalaný eskerilgen. Atalǵan júıe astyq qolhattarynyń, ony ustaýshylardyń jáne astyq qolhattarymen jasalatyn operatsııalardyń esebin avtomattandyrýǵa múmkindik beredi», - dedi QR AShM Ósimdik sharýashylyǵy ónimderin óndirý men qaıta óńdeý departamentiniń sarapshysy Saǵyntaı Jumajanov.
Onyń sózine qaraǵanda, bul qadamdar derekterdiń aıqyndyǵyn, osy saladaǵy ádeıi jasalatyn zań buzýshylyqtardyń táýekelderin barynsha azaıtýdy, bıznestiń shyǵyndaryn tómendetýdi qamtamasyz etýge, sondaı-aq aldaǵy ýaqytta astyqpen elektrondy saýdaǵa ótý úshin alǵysharttardy jasaýǵa múmkindik beredi.
«Astyq naryǵyna qatysýshylardyń, onyń ishinde ekinshi dárejeli bankterdiń tarapynan astyq qolhatyna senimdilik qamtamasyz etiletin bolady, bul óz kezeginde astyq salasyna ınvestıtsııalardy tartýǵa oń áser tıgizedi. Qazirgi kezde Aýyl sharýashylyǵy mınıstrligi oblys ákimdikterimen birge tıisti túsindirý jumystaryn júrgizýde», - dedi sarapshy.
Belgili bolǵandaı, qazirgi kezde elektrondy astyq qolhattarynyń júıesi testilik rejimde iske asyrylýda.
Aıta keteıik, astyq qolhattarynyń ınstıtýty «Astyq týraly» QR Zańyna sáıkes 2002 jyldyń tamyzynan bastap engizilgen bolatyn. Astyq qolhatynyń «qundy qaǵaz» mártebesi bar jáne astyq ıesiniń astyq qabyldaý kásiporynyna saqtaýǵa tapsyrylǵan astyqqa múliktik quqyǵyn rastaıdy. Sonymen qatar astyq qolhaty bankten nesıe alǵan kezde kepildi qamtamasyz ete alatyn bolady. Bul rette astyq qolhaty engizilgen sátinen bastap qaǵaz túrinde aınalymda boldy.