Qazaqstan EYDU Investıtsııalar komıtetine qosylýǵa daıyndyq ústinde

ASTANA. QazAqparat - Bıyl naýryz-sáýir aılarynda Qazaqstannyń EYDU Investıtsııalar komıtetine qosylýy boıynsha jumystar aıaqtalatyn bolady. Bul týraly QR Úkimetindegi baspasóz konferentsııasy barysynda QR IDM Investıtsııalar komıtetiniń tóraǵasy Saparbek Tuıaqbaev málim etti, dep habarlaıdy primeminister.kz .

Onyń aıtýynsha, 2011 jyldan bastap QR Úkimeti EYDU-men birlesip eldegi ınvestıtsııalyq ahýaldy jaqsartýǵa qatysty aýqymdy jumystar atqarǵan. Kóptegen zańdarǵa ózgerister engizilgen, ınvestorlarǵa arnalǵan jumys jeńildetilgen. Sondaı-aq, 55 eldiń ınvestorlary Qazaqstanǵa vızasyz kele alady.

Atqarylǵan eńbek Doing Vusiness reıtıngisindegi Qazaqstan pozıtsııasyn edáýir jaqsartty.

«Investıtsııalar jónindegi komıtettiń quramyna kirý - Qazaqstannyń ınvestıtsııalyq ahýalynyń atalǵan uıymnyń talaptaryna sáıkes kelýiniń kórsetkishi», - dedi S. Tuıaqbaev.

Ol sondaı-aq, Qazaqstannyń EYDU Investıtsııalar komıtetiniń músheliginde bolýy elimizge EYDU-ǵa múshe memleketterdiń aldyńǵy qatarly standarttaryn dáıekti túrde engizýge múmkindik beretinin, sonymen qatar eldiń ınvestıtsııalyq múmkindikterine jáne reıtıngisine oń áserin tıgizetinin aıtyp ótti. Bul iskerlik ortanyń, básekelestiktiń jáne ınvestorlardyń quqyqtaryn qorǵaýdyń joǵarǵy deńgeıiniń kórsetkishi bolyp tabylady. Kóptegen ınvestorlar úshin EYDU Investıtsııalar komıtetiniń moıyndaýy ári qaraıǵy yntymaqtastyq úshin eldi tańdaý kezinde sheshýshi kórsetkish bolyp tabylady.

Eske sala keteıik, birlesken jumystardyń qorytyndysy boıynsha 2016 jylǵy qazan aıynda EYDU Investıtsııalar komıteti Qazaqstandy osy uıymnyń qatysýshysy retinde shaqyrǵan bolatyn.