Qazaqstan ESKATO statıstıka komıteti bıýrosynyń quramyna kirdi

ASTANA. KAZINFORM — Strategııalyq josparlaý jáne reformalar agenttigi tóraǵasynyń orynbasary Oljas Tóleýov ESKATO tóraǵasynyń orynbasary bolyp taǵaıyndaldy. 

9-13 Jeltoqsanda Bangkokta BUU-nyń Azııa jáne Tynyq muhıty úshin ekonomıkalyq jáne áleýmettik komıssııasy (ESKATO) uıymdastyrǵan jyl saıynǵy Azııa-Tynyq muhıty statıstıkasy aptalyǵy ótti.

Іs-sharaǵa elimizdiń atynan Qazaqstan Respýblıkasy Strategııalyq josparlaý jáne reformalar agenttigi tóraǵasynyń orynbasary Oljas Tóleýov qatysty.

Sapar barysynda Oljas Tóleýov Ulttyq statıstıkalyq qyzmet basshylaryna arnalǵan semınarǵa qatysty, onyń negizgi maqsaty — ıkemdi statıstıkalyq júıelerdi qurý máseleleri boıynsha bas statıstıkter arasynda tájirıbe almasý.

Spıkerler qarqyndy ózgerister men tehnologııalyq progress dáýirinde, sondaı-aq egjeı-tegjeıli derekterge suranystyń artýy kezinde ulttyq statıstıka organdary ózderiniń ınstıtýtsıonaldyq jáne tehnıkalyq áleýetin nyǵaıtyp, dástúrli ádister men tájirıbelerden asyp túsýi kerek degen pikirge keldi.

— Aıta ketý kerek, Qazaqstan ESKATO Statıstıka komıteti bıýrosynyń quramyna kirdi jáne Oljas Tóleýov onda tóraǵanyń orynbasary bolyp saılandy. Endi taıaýdaǵy eki jylda Qazaqstan statıstıka komıtetiniń jumysyna belsendi qatysyp, halyqaralyq statıstıkalyq standarttar boıynsha óńirlik ustanymdy qalyptastyryp, statıstıka salasynda oqytý jáne tehnıkalyq qoldaý boıynsha usynymdar usynyp, jańa aqparattyq tehnologııalardy paıdalanýǵa járdemdesedi, — delingen habarlamada.

Eske salsaq, osyǵan deıin Ulttyq statıstıka bıýrosy uıaly baılanys abonentteriniń sanyna qatysty derekti jarııalady.