Qazaqstan Elshisi Nıderland Koroline senim gramotalaryn tapsyrdy
ASTANA. KAZINFORM – Qazaqstan Respýblıkasynyń Nıderland Koroldigindegi Elshisi Aqan Rahmetýllın Nıderland Koroli Vıllem-Aleksandrǵa senim gramotalaryn tapsyrdy. Bul týraly QR Syrtqy ister mınıstrliginiń baspasóz qyzmeti habarlady.
Saltanatty rásim aıaqtalǵannan keıingi kezdesý barysynda Elshi Korolge Qazaqstannyń ishki saıası jáne áleýmettik-ekonomıkalyq damýy týraly, eń aldymen, Prezıdent Qasym-Jomart Toqaev júzege asyryp jatqan aýqymdy reformalar aıasynda aqparat berdi.
Sondaı-aq Korolge memlekettilikti nyǵaıtý, ornyqty ekonomıkany qalyptastyrý, azamattardyń ál-aýqaty men quqyqtyq mártebesin arttyrý maqsatyndaǵy eldi odan ári jańǵyrtýdyń negizgi baǵyttary týraly jan-jaqty málimet usynyldy. Qazaq dıplomaty suhbattasyn Memleket basshysynyń Ulttyq quryltaıdyń V otyrysyndaǵy sóılegen sóziniń jáne «Turkistan» gazetine bergen suhbatynyń negizgi mazmunymen de tanystyrdy.
Korol Vıllem-Aleksandr qazaqstandyq reformalar baǵytyna oń baǵa berip, olardyń Qazaqstan men onyń azamattarynyń ıgiligi úshin mańyzdylyǵyn tilge tıek etti.
Kezdesý barysynda qazaq-nıderland yntymaqtastyǵyn odan ári damytý úshin, onyń ishinde ınnovatsııalar men joǵary tehnologııalar salalarynda aıtarlyqtaı áleýettiń bar ekeni atap ótildi.
Osyǵan deıin AQSh-tyń Qazaqstandaǵy jańa elshisi qazaq tilinde sóılegenin jazǵan edik.