Qazaqstan Elshisi Chernogorııa Prezıdentine senim gramotalaryn tabystady

ASTANA. KAZINFORM — Qazaqstan Respýblıkasynyń Elshisi Dáýlet Batyrashev Chernogorııa Prezıdenti ıAkov Mılatovıchke senim gramotalaryn tapsyrdy. Bul týraly Syrtqy ister mınıstrliginiń baspasóz qyzmeti habarlady.

Senim gramotalaryn qabyldaı otyryp, Chernogorııa basshysy Qazaqstandy Ortalyq Azııa aımaǵyndaǵy eldiń mańyzdy seriktesi dep atap ótti.

«Rásimnen keıin ótken suhbat barysynda taraptar eki el arasynda qalyptasqan qarym-qatynastyń dostyq sıpatyn jáne taraptardyń ózara is-qımyldyń barlyq spektrinde jan-jaqty yntymaqtastyqty odan ári damytýǵa umtylysyn erekshe aıtty», delingen habarlamada.

Saıası yntymaqtastyqty keńeıtý máselelerin talqylaý aıasynda ıA.Mılatovıch kelesi jyly Astanaǵa resmı saparmen barýǵa nıetin bildirdi.

Sondaı-aq Chernogorııa Prezıdenti 2023 jyly jáne bıyl BUU Bas Assambleıasy sessııalary barysyndaǵy Qazaqstan Prezıdenti Qasym-Jomart Toqaevpen kezdesýleri týraly jyly estelikterimen bólisip, Qazaqstan halqyna jáne Memleket basshysyna izgi tilekterin jetkizdi.

Qazaq dıplomaty suhbattasyna Qazaqstannyń ishki jáne syrtqy saıasatynyń basymdyqtary, sonyń ishinde Prezıdent Q.Toqaev bastamashylyq etken aýqymdy saıası jáne áleýmettik-ekonomıkalyq reformalardyń iske asyrylýy jóninde aqparat berdi. Sonymen qatar taraptar halyqaralyq kún tártibindegi ózekti máselelerdi talqylady.

Eske sala ketsek, Aıbek Smadııarov Syrtqy ister mınıstrliginiń Resmı ókili qyzmetinen ketti. Tilshimiz onyń resmı ókil qyzmetinde qandaı oqıǵalarmen este qalǵanyn sholyp shyqty.