Qazaqstan elshiligi Reseı SІM-ine nota joldady
ASTANA. KAZINFORM – Premer-mınıstrdiń orynbasary – Ulttyq ekonomıka mınıstri Serik Jumanǵarın Májilis depýtattarynyń saýalyna joldaǵan jaýapta Reseı tarapy Qazaqstanǵa Eýropadan tranzıtteletin taýarlardyń nege keshigip jatqanyn túsindirdi.
- Reseılik keden qyzmetteriniń qazaqstandyq tasymaldaýshylardy ustaýy Reseı Federatsııasy Úkimetiniń 2022 jylǵy 9 naýryzdaǵy № 313 qaýlysynyń 2024 jylǵy 15 qazandaǵy túzetýleriniń qoldanylýyna baılanysty júrgiziledi. Buǵan deıin tizbege sáıkes jekelegen taýar túrlerin elderge (EO elderi jáne t.b.) áketýge tyıym salý qosymsha taýarlarǵa taratylǵan. Atalǵan ózgerister birqatar taýarlardy (ushqyshsyz ushý apparattary, áskerı kıim, elektr generatorlary, akkýmýlıatorlar jáne t.b.) Reseı aýmaǵynan belgili bir memleketter men aýmaqtarǵa (Eýropa, AQSh, Ýkraına jáne t. b.) áketýge qosymsha shekteýler engizedi. Bul rette Reseı tarapy osy túzetýler engizilgenge deıin qazaqstandyq tarapty habardar etpeı, osy shekteýlerdi birjaqty tártippen engizdi, - dep jazady vıtse-premer.
Shekteý saldarynan Qytaıdan Eýropalyq Odaq elderine Qazaqstan men Reseı Federatsııasynyń aýmaqtary arqyly tranzıtpen ótetin 20 kólik shekarada qańtarylǵan.
- Bul taýarlar ótken jyldyń qazan aıynda áketýge tyıym salynǵan taýarlar tizimine qosyldy. Aıta ketý kerek, Reseı Federatsııasynyń aýmaǵynan taýarlardy áketýge salynǵan tyıymdar men shekteýlerdi saqtamaý Reseı zańnamasyna sáıkes 50 myńnan 300 myń rýblge deıin ákimshilik aıyppul túrinde, taýarlardy tárkileýmen nemese onsyz ákimshilik jaýapkershilikke ákep soǵady. Osy jaǵdaıdy sheshý úshin Qazaqstannyń Saýda jáne ıntegratsııa, Syrtqy ister mınıstrlikteri Reseı Federatsııasynyń ýákiletti organdarymen kelissózder júrgizýde. Saýda jáne ıntegratsııa mınıstrligi Reseı Federatsııasynyń Ekonomıkalyq damý mınıstrligine atalǵan kólik quraldaryn mejeli jerge shyǵarý nemese olardy Qazaqstanǵa qaıtarý máselelerin sheshý týraly hat joldady. EAEO kedendik aýmaǵynan ketken kezde ustalǵan taýarlar deklarantqa nemese ózge de tulǵalarǵa qaıtarylady, - dep jazylǵan jaýapta.
Máskeý bul máseleni Reseıdiń ózine sanktsııa salǵan elderge qarymta jaýaby dep túsindirip otyr.
- Sondaı-aq, Qazaqstannyń Reseıdegi Elshiligi osy máseleni sheshý týraly RF Syrtqy ister mınıstrligine tıisti nota joldady. Reseı tarapynyń aqparatyna sáıkes, Qazaqstan Respýblıkasynyń aýmaǵynan túsetin júkterge qatysty kórsetilgen sharalar eksporttyq baqylaý sharalaryna sáıkes qoldanylady jáne Ulttyq quzyretke jatady. Budan basqa, taýarlardyń jekelegen túrlerin áketýge tyıym salý olardy Reseı Federatsııasy úshin «dostyq emes» elderdiń paıdalanýyna jol bermeý úshin engizildi. Jalpy, bul máseleler Úkimettiń turaqty baqylaýynda, jaqyn arada bul máseleni ekijaqty formatta da, Eýrazııalyq ekonomıkalyq komıssııa alańynda da talqylaý josparlanýda, - deıdi Serik Jumanǵarın.
Eske salsaq, 1 aqpannan bastap Qazaqstandaǵy Álimbet pen Syrym ótkizý pýnkteriniń jabylýyna baılanysty Reseıdiń Orynbor oblysyndaǵy Qazaqstanmen shekaradaǵy ótkizý pýnktiniń jumysy ýaqytsha toqtatylady.