Qazaqstan Elshisi Japonııa ımperatoryna senim gramotalaryn tabystady

NUR-SULTAN. QazAqparat - Tokıodaǵy Imperator saraıynda ótken saltanatty rásim barysynda Qazaqstan Elshisi Sabyr Esimbekov Japonııanyń Imperatory Narýhıtoǵa senim gramotalaryn tapsyrdy, dep habarlaıdy QR SІM baspasóz qyzmeti.

Japonııa monarhy Qazaqstan halqyn el táýelsizdiginiń 30 jyldyǵymen quttyqtap, memleketimizdiń odan ári damýyn jáne órkendeýin tiledi. Osyǵan qosa Imperator Narýhıto Qazaqstan Prezıdenti Qasym-Jomart Toqaevqa jáne Tuńǵysh Prezıdent– Elbasy Nursultan Nazarbaevqa óziniń jyly lebizderin joldap, Qazaqstanmen qatynastardyń odan ári nyǵaıa beretinine senim bildirdi.

Otandyq dıplomat Imperatordy Japonııamen yntymaqtastyqtyń negizgi baǵyttary, sondaı-aq elimizde júrgizilip jatqan saıası jáne ekonomıkalyq reformalardyń barysy týraly habardar etti. Elshi S. Esimbekov Tokıo-2020 Olımpıadasynyń tabysty ótetinine senim bildirdi, óz kezeginde Imperator Narýhıto Tokıo Olımpıadasynda Qazaqstannyń quramasyna sporttyq jetistikter men sáttilik tiledi.

Senim gramotalaryn tapsyrý rásimine bılik basynadǵy Lıberaldy-demokratııalyq partııanyń múshesi, Japonııanyń Qorǵanys mınıstri Nobýo Kıshı qatysty. Suhbat barysynda taraptar koronavırýs indetinen keıingi kezeńde ekonomıkalyq yntymaqtastyqty jandandyrýǵa nazar aýdara otyryp, ekijaqty qatynastardy damytý perspektıvalary týraly pikir almasty.

Jalpy, oryn alǵan is-shara barysynda Qazaqstan men Japonııanyń «Reıva» dáýirinde strategııalyq seriktestikti nyǵaıtýǵa ortaq umtylysy rastaldy.

Aıta keteıik, Imperator Narýhıtonyń taqqa otyrýyna baılanysty 2019 jylǵy 1 mamyrda Japonııada aýdarmasy «ádemi úılesim» degendi bildiretin «Reıva» dáýiri bastaldy.