Qazaqstan drondardy tańbalap ákelý tártibin engizbekshi
ASTANA. KAZINFORM — Ónerkásip jáne qurylys mınıstrligi men Qorǵanys mınıstrligi 2026 jyly pılotsyz ushatyn apparattardyń qozǵalysyn basqaratyn arnaıy ortalyq qurýǵa kirisedi. Bul týraly Premer-mınıstr Oljas Bektenovtiń Májilis depýtatynyń saýalyna joldaǵan jaýapta aıtylǵan.
— Ónerkásip jáne qurylys mınıstrligi múddeli memlekettik organdarmen birge «Erekshe taýarlardy baqylaý týraly» Zańǵa sáıkes naqty taýarlardyń eksporty men ımportyn qoldanystaǵy baqylaýdy eskere otyryp, Qazaqstan Respýblıkasynyń aýmaǵyna ákelý kezinde PUA tańbalaý máselesin sheshý boıynsha jumys júrgizip jatyr. Osylaısha, júrgizilgen jumystardyń qorytyndysy boıynsha zańsyz aınalymdy bolǵyzbaý jáne shyǵarylǵan jeriniń qadaǵalanýyn qamtamasyz etý úshin PUA tańbalaýǵa qoıylatyn biryńǵaı tehnıkalyq talaptardy ázirleý josparlanǵan, — delingen jaýapta.
Úkimet azamattyq pılotsyz avıatsııany damytýdyń 2025-2031 jyldarǵa arnalǵan tujyrymdamasyn bekitken.
— Pılotsyz júıelerdi damytý jónindegi 2025-2031 jyldarǵa arnalǵan arnaıy baǵdarlama sheńberinde ushý aqparatyn tıimdi jınaý úshin (Ónerkásip mınıstriniń 2025 jylǵy 23 mamyrdaǵy № 177 jáne Qorǵanys mınıstriniń 2025 jylǵy 26 mamyrdaǵy № 608 birlesken buıryǵymen bekitilgen) 2026 jyldyń 1 toqsany ishinde PUA ushýyn basqarýdyń, baqylaý men kelisýdiń biryńǵaı ortalyǵyn qurý jónindegi jospardy ázirleý kózdelgen. Tujyrymdama aıasynda ázirlemeler tizbesin qalyptastyrý, bilim berý baǵdarlamalaryn engizý jáne kadrlar daıarlaý, ekonomıka salalarynda qoldaný aıasyn keńeıtý, óndiristi qoldaý, jaýapkershilikti qatańdatý jáne PUA qaýipterin beıtaraptandyrý jónindegi is-sharalar kózdelgen, — dep jazady Premer-mınıstr.
Eske salsaq, maýsym aıynda Syrtqy ister mınıstrliginiń resmı ókili Aıbek Smadııarov Reseıdi ábigerge salǵan pılotsyz ushatyn apparattar Qazaqstan aýmaǵynan ushyryldy degenge saıatyn alyp-qashpa áńgimelerge jaýap bergen edi.