Qazaqstan Dástúrli sadaq atýdan bir altyn, eki qola jeńip aldy

ASTANA. KAZINFORM – 5-shi Dúnıejúzilik kóshpendiler oıyndarynda Dástúrli sadaq atýdan Pýta nysanasyn kózdeý boıynsha jarys aıaqtaldy. Onda qazaqstandyq sportshylar bir altyn, eki qola medalin jeńip aldy.

Búgin «Pýta» nysanasy boıynsha (erler – 70 metr, áıelder – 60 metr) jarys ótti. «Arǵymaq» at-sport kesheninde ótip jatqan básekege 33 memleketten 180 sportshy qatysqan edi. Bul sport túrinen Qazaqstan quramasynda 10 sportshy el namysyn qorǵady.

Aqtyq saıysta qazaqstandyq Jánibek Qulmyrzaev pen majarstandyq Laslo Kochka teń tústi. Oıyn erejesi boıynsha olar taǵy 9 jebe atty jáne qazaqstandyq sportshy 7:6 esebimen basym tústi.
Fınal nátıjesinde erler arasynda qazaqstandyq Jánibek Qulmyrzaev altyn medal, majarstandyq Laslo Kochka – kúmis jáne qazaqstandyq Qanat Qasymhan pen qyrǵyzstandyq Ishak Tokonov – qola medal jeńip aldy.

Áıelder arasynda altyn júlde reseılik Anna Alekseevaǵa berildi, qyrǵyzstandyq Ásel Sadyrova – kúmis, qazaqstandyq Aıkórkem Batıhan men majarstandyq Korenı ıAnka ıÝdıt – qola júlde aldy. 

Erteń 10 qyrkúıekte «Arǵymaq» at-sport kesheninde Qalqan nysanasy boıynsha kezekti jarys ótedi. Onda erler 60 metr, áıelder 50 metr qashyqtyqta nysana kózdeıdi. 

Odan keıingi kúnderi Jamby nysanasy – 30 metr jáne komandalyq jarys (30 metr) ótedi.