Qazaqstan dárigerleri úshin biryńǵaı poshta qyzmeti ashylady

ASTANA. QazAqparat - Qazaqstanda dárigerler úshin biryńǵaı poshta qyzmeti paıda bolady. Bul týraly búgin Úkimet otyrysynda QR Densaýlyq saqtaý mınıstri Eljan Birtanov málim etti, dep habarlaıdy QazAqparat.

«Qazaqtelekom» AQ-men birlese birqatar jobalar iske asyrylýda, onyń ishinde dárigerler úshin biryńǵaı poshta qyzmeti bar. Joba aıasynda 8 myń tirkeý jazbasy quryldy. Júıege dárigerler kúnine shamamen 170 myń ret kiredi. Atalǵan qyzmet dárigerlerge ózara baılanys qurýǵa, saladaǵy túrli taqyryptarda pikir almasý úshin toptardy jasaqtaýǵa múmkindik beredi. Sonymen qatar mınıstrlik ol júıeni medıtsınalyq qyzmetkerlerdiń aqparattaryn taratýǵa paıdalanady. Qazirgi kezde 250 myń orta jáne kishi medıtsınalyq qyzmetkerler úshin tirkeý jazbalaryn quryp jatyrmyz»,-dedi mınıstr.

Onyń sózine qaraǵanda, elimiz boıynsha ınternet jelisine qosylǵan medıtsınalyq uıymdardyń ortasha kórsetkishi 53 paıyzdy qurap otyr. Bul turǵyda Astana men Almatyda 100 paıyzdyq deńgeı qamtamasyz etilgen, al tómen kórsetkishter Soltústik Qazaqstan (15 paıyz), Pavlodar (33 paıyz), Qostanaı (27,7 paıyz), Qaraǵandy (34,9), Shyǵys Qazaqstan (29,4 paıyz), Aqtóbe (36,8 paıyz) jáne Aqmola (23,2 paıyz) oblystarynda baıqalýda.

«Sonymen birge óńirler men Astana jáne Almaty qalalarynyń barlyq qalalyq, oblystyq densaýlyq saqtaý uıymdary men aýdandyq ortalyq aýrýhanalar ınternetke qosylǵan. Aýyldyq jerlerde tehnıkalyq múmkindikterdiń joqtyǵynan densaýlyq saqtaý uıymdarynyń jelige qosylý problamasy bar»,-dedi Birtanov.

Belgili bolǵandaı, júzege asyrylyp jatqan joba aıasynda 2017-2019 jyldardaǵy birinshi kezeńde densaýlyq saqtaý mekemelerin ınternetpen qamtamasyz etý josparlanyp otyr.