Qazaqstan dándi jáne maıly daqyldar óndirý boıynsha Ortalyq Azııa óńirinde kóshbasshy el — Bektenov
ASTANA. KAZINFORM — Oljas Bektenov FAO-nyń óńirlik ókili Vıorel Gýtsýmen AÓK jáne sý resýrstary salasyndaǵy yntymaqtastyq máselelerin talqylady. Bul týraly Úkimettiń baspasóz qyzmeti habarlady.
Qazaqstan Respýblıkasynyń Premer-mınıstri Oljas Bektenov FAO-nyń Eýropa jáne Ortalyq Azııa boıynsha óńirlik ókili — bas dırektordyń orynbasary Vıorel Gýtsýmen kezdesý ótkizdi.
Prezıdent Qasym-Jomart Toqaev pen BUU Azyq-túlik jáne aýyl sharýashylyǵy uıymynyń (FAO) basshysy Tsıýı Dýnıýı arasyndaǵy qol jetkizilgen ýaǵdalastyqtardy júzege asyrý josparlary talqylandy. Qazaqstan — FAO áriptestik baǵdarlamasy sheńberinde birlesken jobalardy iske asyrýǵa nazar aýdarylýda. Uıymnyń elimizdegi portfeli 55 jobadan turady.
— Biz sizdermen keshe Almatyda Ortalyq Azııa men Aýǵanstan elderi úshin ornyqty damý maqsattary jónindegi BUU ortalyǵyn qurý týraly mańyzdy sheshim qabyldanǵannan keıin kezdesip otyrǵanymyz nazar aýdartady. Memleket basshysynyń bastamasyn BUU Bas Assambleıasyna múshe barlyq el biraýyzdan qoldaǵany qýantady. Bul — joǵary senim men úlken jaýapkershiliktiń belgisi. Búgingi dıalog agroónerkásip kesheni men sý resýrstary salasyndaǵy yntymaqtastyq máselelerin jan-jaqty qarastyrýǵa múmkindik beretinine senimdimin. Qazaqstan dándi jáne maıly daqyldar óndirý men eksporttaý boıynsha Ortalyq Azııa óńirinde kóshbasshy el sanalady. Biz aýyl sharýashylyǵy ónimderin qaıta óńdeýdi belsendi damytyp, joǵary deńgeıde óńdelgen ónim úlesin 70%-ǵa deıin jetkizýge nıettimiz. Aldaǵy úsh jylda AÓK-te quny $4,8 mlrd bolatyn 600-den astam ınvestıtsııalyq jobany iske asyrýdy josparlap otyrmyz. Bul maqsattarǵa qol jetkizýde FAO mańyzdy strategııalyq seriktes bolyp otyr, — dep atap ótti Oljas Bektenov.
Búginde azyq-túlik qaýipsizdiginiń jahandyq ındeksinde Qazaqstan 113 el ishinde 32-shi orynda tur. Otandyq aýyl sharýashylyǵy ónimderi 80 elge eksporttalady. Ótken jyldyń qorytyndysy boıynsha agroónerkásip keshenin qoldaý boıynsha qabyldanǵan sharalar nátıjesinde jalpy ónimniń ósimi 13,7%-dy qurady.
Bas dırektordyń orynbasary — FAO-nyń Eýropa jáne Ortalyq Azııa boıynsha óńirlik ókili Vıorel Gýtsý Qazaqstannyń agroónerkásip sektoryndaǵy eleýli áleýetin atap ótip, aýyldyq aýmaqtardy ornyqty damytý úshin yntymaqtastyqty keńeıtýdiń mańyzdylyǵyn atap ótti.
— Qazaqstan ınnovatsııalyq tásilder men tehnologııalardy engize otyryp, aýyl sharýashylyǵyn damytýǵa, sondaı-aq qarjylandyrý men ınvestıtsııaǵa qoljetimdilikti jaqsartýǵa belsendi umtylýda. Qazaqstan 2018 jylǵy shildede Qazaqstan Úkimeti men FAO arasyndaǵy negizdemelik kelisimdi ratıfıkatsııalady. «FAO-Qazaqstan áriptestik baǵdarlamasy» (FQÁB) osy kelisimniń ajyramas bóligi bolyp sanalady. Qazaqstannyń Aýyl sharýashylyǵy mınıstrligi qarjylandyratyn FQÁB-tyń negizgi baǵyttary azyq-túlik qaýipsizdigin arttyrý, agrobıznesti tsıfrlandyrý, resýrstardy turaqty basqarý jáne eksporttyq áleýetti damytý, bul aýyldyq aýmaqtardyń ornyqty ósýine jáne aýyl turǵyndarynyń ómirin jaqsartýǵa yqpal etedi, — dedi Vıorel Gýtsý.
Sonymen qatar sý resýrstary salasyndaǵy yntymaqtastyqtyń keleshegi talqylandy. Qazaqstan sý sharýashylyǵy salasyn aýqymdy jańǵyrtý, onyń ishinde jańa 20 sý qoımasyn salý jáne keminde qoldanystaǵy 15 sý qoımasyn rekonstrýktsııalaý, sondaı-aq 3,5 myń shaqyrymnan astam ırrıgatsııalyq arnalardy rekonstrýktsııalaý jáne tsıfrlandyrý júzege asyrylady. Kezdesýge qatysýshylar Kaspıı teńizindegi ekologııalyq máseleni sheshý uzaqmerzimdi halyqaralyq ózara is-qımyldyń basym mindetine aınalýy tıis ekenin atap ótti.
Kezdesý qorytyndysy boıynsha ózara tıimdi yntymaqtastyqty odan ári damytý jáne birlesken bastamalardy tabysty iske asyrý úshin ózara is-qımyldy nyǵaıtýǵa daıyndyq rastaldy.
Aıta ketelik Oljas Bektenov «Qazaqstan – Eýroodaq» dıalogtik platformasy otyrysyn ótkizgen edi.