Qazaqstan da nysanada tur: Saǵymbaev elimizdiń ishki jáne syrtqy jaýlary týraly aıtty
ASTANA. KAZINFORM - Aspannyń ashyq, eldiń tynysh bolýy kózge kórinbeıtin qajyrly eńbektiń arqasynda keledi. Ulttyq qaýipsizdik organdary kúni qarsańynda UQK tóraǵasy Ermek Saǵymbaev Kazinform agenttigine eksklıýzıvti suhbat berip, elimizdiń aldynda turǵan basty syn-qaterlerdi atady. Onyń ishinde terrorızm, dinı ekstremızm, transulttyq qylmys, kıbershabýyldar men syrtqy yqpal etý áreketteri de bar. Nelikten qylmyskerler neırojelilermen qarýlanyp jatyr? Jańa geosaıası jaǵdaıda barlaý men qarsy barlaý qalaı jumys isteıdi? Ekonomıkaǵa mıllıardtaǵan teńge shyǵyn keltirgenderdiń artynda kimder tur jáne UQK olardy qalaı qaıtaryp jatyr? Barlyq saýaldyń jaýabyn osy suhbattan bile alasyz.
— Ermek Aldabergenuly, eldiń qaýipsizdigine qatysty máselelerdi qoǵam erekshe nazarda ustaıdy. Ulttyq qaýipsizdik organdary kúni qarsańynda ulttyq qaýipsizdik salasyndaǵy negizgi syn-qaterler týraly aıtyp berseńiz. Bul qaýip-qataerlerdi toqtatý úshin UQK qandaı jumystar atqaryp jatyr?
— Qazir álem áldeqaıda kúrdeli ári boljap bolmaıtyn sıpatqa ıe boldy. Biz muny kúndelikti jedel-qyzmettik jumysymyzda kórip otyrmyz. Arnaıy qyzmetterdiń aldynda turǵan qaýip-qaterler árqıly ári bir-birimen baılanysty bola bastady.
Bir jaǵynan, halyqaralyq terrorızm men dinı ekstremızm, zańsyz kóshi-qon, transulttyq qylmys pen esirtki bıznesi syndy biz «dástúrli» sanaıtyn qylmystar áli qaıtalanyp jatyr.
Sonymen qatar, tsıfrlyq tehnologııalardyń keń taralýyna jáne jasandy ıntellektiniń barlyq ómir salalaryna enýine baılanysty jańa qaýip-qaterler shyqty. Bul múmkindikterdi qylmystyq jáne terrorıstik toptar belsendi túrde paıdalanýǵa kóshti.
Biz jahandyq geosaıası ahýaldy da eleýsiz qaldyra almaımyz. Bir óńirde bolǵan jaǵdaılar lezde basqa elderdiń qaýipsizdigine áser etedi. Qazaqstan jahandyq saıasattyń belsendi ókili retinde bul qaýip-qaterlerden tys qala almaıdy. Saıası qysym kúsheıip, qoǵamdyq sanaǵa yqpal etip jatyr, ultaralyq jáne óńirlik máseleler ózekti bola tústi, mádenı-adamgershilik jáne demografııalyq damý úrdisterine nuqsan keltirip otyr.
Osyndaı jaǵdaıda Ulttyq qaýipsizdik komıtetiniń basty róli — eldegi qoǵamdyq-saıası turaqtylyqty qamtamasyz etý, aýmaqtyq tutastyqty qorǵaý jáne beıbitshilik pen kelisimdi saqtaý. Osy aıtylǵandar kez kelgen memlekettiń ornyqty ári qaýipsiz damýynyń negizgi tirekteri.
Aıtqym keletin bir jaıt, arnaıy qyzmetterdiń jumysy kózge túspeı, únsiz júrgende tıimdi bolady. Degenmen bul jumystardyń mańyzy týraly aıtý kerek, sebebi beıbit ýaqytta da ulttyq qaýipsizdik árdaıym qaýip-qaterge kezigip otyrady. Al ony qorǵaý úzdiksiz, muqııat ári kásibı qyzmetti talap etedi.
— Dinı ekstremızm men terrorızm máselesi ár kez ózekti sanalady. Qazir qazaqstandyq arnaıy qyzmet bul baǵytta qandaı mindetter arqalap, qaı baǵytta áreket etip jatyr?
— Durys aıtasyz, halyqaralyq terrorıstik jáne dinı-ekstremıstik uıymdar qazaqstandyqtardy radıkaldy ıdeologııaǵa tartý úshin jasap jatqan amaldaryn toqtatar emes. Keıbir azamattar destrýktıvti úgit-nasıhattyń yqpalyna túsip, terrorızm men dinı ekstremızm ıdeologııasyna beıim boldy. Ádette bul sheteldik yqpal sanalady, kóbi ınternet arqyly júzege asady.
Ulttyq qaýipsizdik komıteti úshin terrorızmmen kúres jáne elde terrorıstik nemese basqa da kúsh qoldaný aktilerine jol bermeý — basym baǵyttyń biri.
Mysaly, bıyl Aqtóbe, Atyraý oblysy men Shymkent qalasynda terrorızmdi nasıhattaǵany, terrorıstik qyzmetke adam tartqany jáne atys qarýyn zańsyz saqtaǵany úshin birqatar azamattar sot úkimimen kináli dep tanylyp, túrli merzimge bas bostandyǵynan aıyryldy.
Olar óz aınalasyndaǵy adamdardy shetelde terrorıster jaǵynda soǵys qımyldaryna qatysýǵa jáne dinı sebeppen kúsh qoldanýǵa úgittegen. Ózderiniń radıkaldy kózqarastaryn ınternettegi ekstremıstik materıaldardy zertteý arqyly nyǵaıtyp otyrǵan.
Osyndaı qylmystar boıynsha bıyldyń ózinde 59 adam ustaldy jáne 60-tan astam adam sottaldy.
Sheteldik radıkaldar elimizge qalaı kelip-ketedi, kóshi-qon arnalary qandaı, osylardy izdestirý jumystary uıymdastyryldy. 2025 jyldyń basynan beri terrorızmge qatysy bar degen kúdikpen 3,5 myńǵa jýyq sheteldikke elge kirýge tyıym salyndy. Terrorıstik qyzmetke qatysy bar 246 sheteldik Qazaqstanǵa kirýge talpynǵanymen, jolyn kestik. Óz elderinde terrorızm men dinı ekstremızm úshin izdeýde júrgen 16 adam ustaldy. Terrorızm men dinı ekstremızm ıdeıasyn qoldaıtyn 800-ge jýyq mıgrant anyqtalyp, olardy elden shyǵarý sharalary qabyldandy.
Radıkaldy ıdeıalardyń aldyn alý keń aýqymdy vedomstvoaralyq úılestirýdi talap etedi. Osyǵan baılanysty ýákiletti memlekettik organdarmen birlesip, terrorızm ıdeologııasyna qarsy kúres boıynsha keshendi sharalar iske asyrylýda. Terrorızm men ekstremızmdi nasıhattaıtyn 9 myńnan astam ınternet materıaldar anyqtalyp, buǵattaldy.
Qazir elimizdiń Antıterrorıstik ortalyǵynyń úılestirýimen terrorızmge qarsy is-qımyldyń jalpymemlekettik júıesi qurylyp, memlekettik jáne jergilikti atqarýshy organdardyń jumysy jolǵa qoıyldy. Quqyqtyq jáne materıaldyq-tehnıkalyq qamtamasyz etý jetildirile tústi.
Jyl basynan beri 400-den astam oqý-jattyǵý men terrorızmge qarsy daıyndyqtar uıymdastyrylǵan. 95 myńnan astam strategııalyq nysan qyzmetkerlerine terakt bolǵan jaǵdaıda qalaı áreket etý keregi jóninde trenıngter ótkizildi.
Maýsym aıynda Qostanaı oblysynda respýblıkalyq «Naıza-Antıterror-2025» oqý-jattyǵýynyń qorytyndy kezeńi ótti. Onda terrorızmge qarsy kúrestegi memlekettik organdardyń «gıbrıdti» qaýip-qaterlerge qarsy turýǵa daıyndyǵy tekserildi.
Buǵan qosa komıtet ulttyq múddelerdi, konstıtýtsııalyq qurylysty jáne qoǵamdyq qaýipsizdikti qorǵaýǵa erekshe kóńil bólip otyr. Basym baǵyttardyń biri — ulttyq ekstremızmge, separatızmge jáne azamattardy sheteldik qarýly qaqtyǵystarǵa tartýǵa qarsy turý. Qabyldanyp jatqan sharalar destrýktıvti áreketterge jol bermeýge múmkindik berip jatyr.
Quqyq qorǵaý organdarymen birlesip, ultaralyq arazdyqty qozdyratyn jáne radıkaldy kózqarasty ustanatyn tulǵalardy anyqtaý boıynsha jumystar atqaryldy.
– Siz atap ótkendeı álemdegi geosaıası jaǵdaı elimizdiń ekonomıkasyna da zııan tıgizedi. Bul baǵytta taǵy qandaı qaýip-qater baıqalyp jatyr?
— Jahandyq ekonomıkadaǵy kúızelister jalpy sıpatqa ıe bolyp, Qazaqstan ekonomıkasyna da tikeleı áserin tıgizip otyr.
Osy jaǵdaıda Komıtettiń qyzmeti el basshylyǵyna ekonomıkalyq turaqtylyqty qamtamasyz etý jáne josparlanǵan reformalardy tolyqqandy iske asyrýǵa járdemdesý qaǵıdattaryna negizdeledi.
Biz osy baǵytta tóngen qaýipterge aldyn ala keshendi taldaý júrgizemiz, ýákiletti ınstantsııalarǵa ekonomıkalyq sektorlardaǵy damý máselelerin usynamyz. Zııannyń aldyn alý boıynsha usynystar men júıeli sharalar ázirlenedi.
Áleýmettik-ekonomıkalyq damý, bıýdjettik-salyq saıasaty jáne kóleńkeli ekonomıkamen kúres máseleleri únemi nazarda tur.
Shıkizat jáne óńdeý salalaryndaǵy jasyryn shemalar júıeli túrde anyqtalyp, olardy toqtatý boıynsha jumys atqarylyp keledi. Sheshim qabyldaý protsesterinde syrtqy yqpal etý áreketteri áshkerelenip, joıylyp jatyr.
Ulttyq kompanııalar men júıe quraýshy kásiporyndarǵa iri ınfraqurylymdyq jobalardy júzege asyrý jáne halyqaralyq saýda yntymaqtastyǵy aıasynda ekonomıkalyq múddelerdi ilgeriletýge járdem kórsetildi.
Mysaly, UQK materıaldary boıynsha, «Eleas» kompanııasy men Densaýlyq saqtaý mınıstrliginiń birqatar laýazymdy tulǵalarynyń zańsyz áreketteri toqtatyldy. Olar bir shet elden belgisiz dárilik preparattardy shıkizat retinde jasyryp, kontrabandalyq jolmen elge kirgizip, keıin ony jalǵan óndiris arqyly Qazaqstanda ótkizgen. Sot sheshimimen keltirilgen shyǵyn kólemi 26 mlrd teńgeni qurady.
Sondaı-aq respýblıkalyq mańyzy bar avtojoldy qaıta jańǵyrtý jobasyn iske asyrý barysynda 300 mln teńgeden astam bıýdjet qarjysyn jymqyrǵan «Qazavtojol» UK» AQ-nyń burynǵy basshysynyń qylmystyq áreketi toqtatyldy.
Osyndaı mysaldar jetkilikti, jumys qarqyny báseńdemeıdi. Jalpy, jyl basynan beri UQK-niń ekonomıkalyq qaýipsizdikti qamtamasyz etý sharalary nátıjesinde 3,8 trln teńgeden astam ekonomıkalyq shyǵynnyń aldyn aldyq, bıýdjetke 254 mlrd teńge qaıtaryldy.
— Transulttyq qylmyspen, sonyń ishinde esirtki bıznesimen jáne zańsyz qarý aınalymymen kúres baǵytynda qandaı jumystar istelip jatyr?
— QR Prezıdenti quqyq qorǵaý organdarynyń keńeıtilgen alqa otyrysynda aıtqanyndaı, kúshtik blok jumysynyń basty qaǵıdaty — «Zań men tártip».
Bizdiń negizgi maqsatymyz qoǵamdy transulttyq qylmys pen esirtki bıznesinen barynsha qorǵaý.
Endi naqty nátıjelerge toqtalsam, jyl basynan beri ІІM-men birlesip 15 qylmystyq toptyń qyzmeti toqtatylyp, 218 múshesi ustaldy, 73 adam qamaýǵa alyndy.
Mysaly, maýsym aıynda Oral qalasynda kásipkerlerden aqsha bopsalaǵan qylmystyq top áreketi áshkerelendi. 8 azamat ustalyp, ekeýi sot sanktsııasymen qamaýǵa alyndy. Qazir aldyn ala tergeý júrip jatyr.
Sonymen qatar, polıtsııa jáne prokýratýra organdarymen birlesip, 351 atys qarýy, 57 granata jáne 5,5 myńnan astam oq-dári tárkilendi. Bular «qańtar oqıǵasy» kezinde urlanǵan arsenaldyń bir bóligi. Osylaısha qarýdyń destrýktıvti ortaǵa jetkizilýi jáne ony qoǵam men memleketke qarsy qoldaný qaýipi joıyldy.
Transulttyq qurylymdar tarapynan elge baǵyttalǵan belsendi esirtki ekspansııasy baıqalýda. Bul — ult densaýlyǵyna tóngen tikeleı qaýip ári ulttyq qaýipsizdikke zııan tıgizetin áreket.
Narkobıznespen kúres úsh negizgi elementke baılanysty: halyqaralyq esirtki trafıgi, psıhotroptyq zattardy óndirý men taratý, sondaı-aq kannabıs negizindegi zańsyz óndiristiń ózindik shıkizat bazasy bar.
Osy baǵytta qabyldanǵan sharalar nátıjesinde 13 esirtki zerthanasy joıylyp, 29 halyqaralyq jáne óńirlik esirtki arnasy anyqtaldy.
Máselen, bıyl mamyr aıynda Qazaqstan men Ózbekstan qaýipsizdik qyzmetteri birigip, Azııa elinen Qazaqstanǵa Ózbekstan aýmaǵy arqyly iri kólemde apıyn men gashısh jetkizýdiń jolyn kesti. Transulttyq esirtki qurylymynyń 4 múshesi ustaldy, 82 keli apıyn jáne 130 keli gashısh tárkilendi. Qara naryqtaǵy quny shamamen 2 mln dollar bolýy múmkin.
Jalpy alǵanda, jarty jyl ishinde 3,4 tonnadan astam esirtki men 7,5 tonnaǵa jýyq prekýrsor alyndy.
Kórip otyrǵanyńyzdaı, jumys aýqymdy, biraq sheshimin tappaǵan máseleler de jeterlik. Biz olardy sheshýge jáne óz qyzmetimizdi jetildirýge umtylyp jatyrmyz.
— Siz jańa qaýip-qaterdiń biri retinde kıberqaýipsizdik salasyndaǵy qylmystardy atadyńyz. Bul baǵytta Komıtet qandaı sharalardy iske asyryp jatyr?
— Zamanaýı tehnologııalar keńinen taralyp, qazir ómirdiń ajyramas bóligine aınaldy. Iá, onyń artyqshylyǵy jeterlik.
Alaıda bul tehnologııalyq damý kıberqylmyskerlerdiń de quralyna aınalyp otyr. Olar qazir tsıfrlyq ınfraqurylymǵa eleýli zalal keltirip jatyr.
Memleket basshysynyń tapsyrmasyna sáıkes, UQK ІІM, Tsıfrlyq damý mınıstrligi jáne Bas prokýratýramen birlesip kıberqylmyspen kúres tetikterin jetildirý boıynsha júıeli jumys atqaryp jatyr.
UQK bastamasymen Qylmystyq jáne Qylmystyq-protsestik kodeksterge, «Jedel-izdestirý qyzmeti týraly» zańǵa halyqaralyq tájirıbe eskerilgen birqatar ózgerister engizý usynyldy.
Bul jumys alǵashqy nátıjesin berip otyr. Prokýratýra jáne polıtsııa organdarymen birlesip, elimizdiń birqatar qalalarynda abonenttik nómirlerdi zańsyz paıdalaný faktileri anyqtaldy.
Alaıaqtyqpen kúres aıasynda bıyl ІІM-men birlesip 12 qalada birqatar sharalar atqardyq. Qazaqstan men shetel azamattarynan birikken toptar ustalyp, alaıaqtyq shemalarda paıdalanylǵan 76 SIM-box qurylǵy tárkilendi.
UQK ınformatızatsııa jáne baılanys salasyndaǵy qylmystyq quqyq buzýshylyqtardy, sonyń ishinde túrli derekter bazasynda saqtalǵan qupııa aqparatty zańsyz ózgertý faktilerin tergep jatyr.
Jalpy, osy jáne basqa da faktiler boıynsha 40-tan astam qylmystyq is qozǵaldy.
Aqparattyq qaýipsizdik salasynda bıyl jarty jylda elimizdiń mańyzdy ınfraqurylym nysandaryna jasalǵan 965,4 mln kıbershabýyl men 3,5 myńnan astam DDoS-shabýyldyń betin qaıtardyq. Shamamen 1 myń fıshıngtik ınternet-resýrs anyqtaldy.
Jalǵan terrorızm týraly habarlamalar taratýdyń 68 faktisi boıynsha izdestirý sharalary júrgizilip, protsessýaldyq sheshimder qabyldandy.
Telegram messendjeri arqyly esirtki jáne psıhotroptyq zattardy taratýmen aınalysqan 66 adam, sondaı-aq esirtki úshin aqy qabyldaýǵa paıdalanylǵan 325 bank kartasy anyqtaldy.
Internet arqyly sýıtsıdti nasıhattaǵan jáne adamdardy ózin-ózi óltirýge ıtermelegen 49 adamdy tabyldy.
Aldyn alý jáne ýaqtyly áreket etý sharalaryna erekshe mán beremiz. Kıberqaýipterge qarsy tıimdi áreket etý tetikterin ázirleý úshin jyl saıyn oqý-jattyǵýlar ótkiziledi. Olar shartty shabýyl jasaýshylardy izdep tabý, ustaý jáne tsıfrlyq dálelderdi jınaý boıynsha tergeý is-áreketterin qamtıdy.
— Ádette, qarsy barlaý men syrtqy barlaý qyzmetiniń jumysyndaǵy jetistikter kópshilikke kórine bermeıdi. Bul baǵyttaǵy qyzmet týraly az da bolsa málimet aıta alasyz ba?
— Durys aıtasyz, syrtqy jáne qarsy barlaý qyzmetiniń ereksheligine baılanysty olardyń jumys nátıjesi kópshilikke jarııa etilmeıdi.
Soǵan qaramastan olardyń jumystary ulttyq qaýipsizdikti qamtamasyz etýde mańyzdy ról atqarady.
Qazaqstannyń syrtqy barlaý qyzmeti elimizdiń ulttyq múddelerine saıası, ekonomıkalyq, áskerı jáne tehnologııalyq salalarda yqpal etýi múmkin aldyn ala aqparattardy jınap, taldaıdy.
Al qarsy barlaý qyzmeti elimizdiń saıası turaqtylyǵyna, ekonomıkalyq jaǵdaıyna jáne qorǵanys áleýetine nuqsan keltirýge baǵyttalǵan sheteldik barlaý áreketterin ýaqytynda anyqtaıdy.
Kúndelikti negizde bizdiń azamattardy quqyqqa qarsy áreketterge tartýǵa tyrysatyn jekelegen sheteldik sýbektilerdiń áreketteri anyqtalyp, joly kesilip jatyr.
Qarsy barlaý qyzmetiniń taǵy bir mańyzdy baǵyty — zańsyz kóshi-qonmen kúres. Bul baǵytta biz kórshiles elderdiń arnaıy qyzmetterimen birge jumys isteımiz.
Barlaýshylar men qarsy barlaýshylar tanymal bolýdy maqsat etpeıdi. Olardyń mıssııasy — beıbitshilik pen turaqtylyqty qamtamasyz etý, azamattardyń erteńgi kúnge senimmen qaraýyna jaǵdaı jasaý. Qazaqstan azamattary tynysh ómir súrip, eńbek etip jatyr. Mine, osynyń ózi biz qoıǵan mindetterdiń oryndalyp jatqanyn kórsetedi.
— Qazirgi jaǵdaı shekara qaýipsizdigine de jańa talaptar qoıyp otyr.Qazaqstan shekarasy qanshalyqty qorǵalǵan? Shekarashylar aldynda qandaı máseleler tur?
— Memlekettik shekarany qorǵaý men kúzetý de Ulttyq qaýipsizdikti qamtamasyz etýdiń basym baǵyttarynyń birine jatady. Terrorızm, zańsyz kóshi-qon jáne esirtki aınalymy qaýpiniń ózektiligi jaǵdaıynda shekara qyzmetiniń jumysy únemi jetildirilip otyr.
Búginde Shekara qyzmeti áldeqaıda mobıldi, zamanaýı talaptarǵa saı áreket etedi jáne elimizdiń shekaralaryn senimdi qorǵaıdy.
2025 jyldyń basynan beri shekarashylar 14,6 myńnan astam shekaralyq rejımdi buzǵan adamdardy ustady. Qarý men oq-dárini elge zańsyz ákelýdiń 475 áreketiniń jolyn kesti, zańsyz 14 mlrd teńgeden astam shetel valıýtasyn alyp ótpek bolǵan jaǵdaılarǵa tosqaýyl qoıdy.
Qazir ozyq tehnologııalar engizilip jatyr. «Astana», «Almaty» áýejaılarynda jáne «Qordaı» avtomobıl ótkizý pýnktinde avtomattandyrylǵan shekaralyq baqylaý júıeleri iske qosyldy. Baqylaý jasandy ıntellekt pen avtomattandyrylǵan derekqorlardy qoldaný arqyly kúsheıtildi. Bul tájirıbe aldaǵy ýaqytta barlyq shekara boıynda jalǵasady.
Úkimettiń qoldaýymen 10 avtomobıl ótkizý pýnktiniń zamanaýı ınfraqurylymyn qalyptastyrý jumystary júrgizildi. Bul jumystar aıaqtalǵan soń, olar zamanaýı baqylaý quraldaryna negizdelgen tıimdi, qaýipsiz jumys isteýge múmkindik beredi.
Barlyq ótkizý pýnktteri biryńǵaı tsıfrlyq júıege biriktirilýde. Bul ereje buzýshylyqtardy jedel anyqtaýǵa jáne azamattardyń shekaradan ótý ýaqytyn qysqartýǵa múmkindik beredi.
Basty maqsat — qaýipsizdikti qamtamasyz etip, artyq bıýrokratııalyq kedergilerdi boldyrmaý. Bul ásirese transshekaralyq saýda men týrızmdi damytý úshin mańyzdy.
Sonymen qatar shekara ınfraqurylymyn jáne ınjenerlik jabdyqtardy jetildirýde birqatar máseleler de bar. Bul jumystar óte kúrdeli ári qomaqty qarjyny talap etedi. Ol kezeń-kezeńimen iske asyrylyp jatyr.
— Komıtette jaqynda Sybaılas jemqorlyqqa qarsy qyzmet qurylǵanyn bilemiz. Endi onyń negizgi baǵyttary qandaı bolady?
— Memleket basshysynyń Jarlyǵymen burynǵy agenttik qaıta qurylyp, UQK quramynda jańa qyzmet quryldy.
Bul sheshimdi strategııalyq mańyzy bar qadam dep aıta alamyz. Sybaılas jemqorlyqqa qarsy baǵytty UQK-ge qosý arqyly jemqorlyqpen kúresti múldem jańa deńgeıge kóterýge múmkindik aldyq.
Komıtettiń analıtıkalyq, jedel jáne tehnıkalyq múmkindikterin antıkorrýptsııalyq quraldarmen biriktirý bizge aýqymdy ári júıeli zańbuzýshylyqtardy anyqtaýǵa kóbirek jaǵdaı jasaıdy. Qylmystyń túpki sebepterin de joıýǵa jol ashady.
Qazir biz Jarlyqtan týyndaıtyn qadamdyq is-sharalar algorıtmin jasap jatyrmyz, sonyń ishinde tıisti normatıvtik-quqyqtyq baza ázirlenip jatyr.
Úkimetpen jáne Memlekettik qyzmet isteri agenttigimen birlesip, burynǵy vedomstvonyń fýnktsııalaryn jáne ókilettikterin berý máseleleri qarastyrylǵan.
Bunyń bári kúrdeli jáne kópsatyly protsess. Degenmen jańa qyzmettiń jumysy bir sátke de toqtaǵan joq.
Memleket basshysy atap ótkendeı, sybaılas jemqorlyqpen júıeli kúresý — óte qajetti is bolyp tur. Zań men tártipti nyǵaıtý jaǵy azamattardyń quqyqtary men bostandyqtaryn qorǵaýdyń negizi bolýǵa tıis. Osy mindetter oryndalmaıynsha ádiletti memleket qurý múmkin emes.
— Komıtette kadrlardy irikteý qalaı júrgiziledi? Qandaı mamandyqtar suranysqa ıe? Sizder úshin sporttyq daıyndyq qanshalyqty mańyzdy?
— Kadrlyq jumys Komıtet úshin strategııalyq basymdyq sanalady. Komıtetke kim kelip, qalaı daıyndalatyny eldiń qaýipsizdigine tikeleı áser etedi.
Qazir bizde eki mamandandyrylǵan joǵary oqý orny jumys isteıdi: UQK akademııasy jáne Shekara akademııasy. Jýyrda osy oqý oryndarynda jas ofıtserlerdiń kezekti túlekteri oqýyn bitirip shyqty.
Bolashaq qyzmetkerlerdi oqytý barysynda biz jańa tehnologııalardy, qoldanbaly ádister men shynaıy praktıkalyq tájirıbelerdi engizip otyrmyz.
UQK-ge qabyldaý qatań tártippen júzege asady. Qyzmetke tek Qazaqstan azamattary qabyldanady, olar bilim, fızıkalyq daıyndyq, moraldyq turaqtylyq jáne analıtıkalyq oılaý sııaqty birqatar talaptarǵa saı bolýǵa tıis.
Tsıfrlyq tehnologııalar dáýiri zamanaýı talaptardy kún sanap kúsheıtip otyr. Sondyqtan kıberqaýipsizdik pen aqparattyq qaýipsizdik salasynda ІT, telekommýnıkatsııalar jáne tsıfrlyq analıtıka salasyndaǵy mamandar úlken suranysqa ıe.
— Ulttyq qaýipsizdik organdary kúni qarsańynda áriptesterińizge ne tiler edińiz?
— Ulttyq qaýipsizdik organdary kúni qarsańynda barlyq áriptesterimdi jáne ardagerlerimizdi kásibı merekesimen quttyqtaımyn.
Sizderdiń qajyrly eńbekterińizdiń arqasynda qoǵamda turaqtylyq pen beıbitshilik saqtalady, qaýipterdiń aldy alynyp, memlekettiń ornyqty damýyna jaǵdaı jasalyp otyr.
Sizderge zor densaýlyq, mol baqyt, bereke-birlik jáne qyzmetterińizde tabys tileımin!