Qazaqstan chempıonatynda júldeli orynnan úmittimiz – «Jaıyq» voleıbol klýbynyń kapıtany
ORAL. KAZINFORM — Oraldaǵy «Jaıyq arena» sport kesheninde voleıboldan erlerdiń ulttyq lıga komandalary arasynda Qazaqstan chempıonatynyń qorytyndy kezeńi ótip, jeńimpaz-júldegerler anyqtalady. Osyǵan oraı Kazinform tilshisi «Jaıyq» voleıbol klýbynyń jáne Qazaqstan ulttyq quramasynyń kapıtany, halyqaralyq dárejedegi sport sheberi Vıtalıı Vorıvodınmen áńgimelesken edi.
- Vıtalıı, voleıbolǵa qalaı keldińiz, aldymen sol jóninde aıtsańyz?
- Men osy Oral qalasynda týyp-óstim. Oblys ortalyǵyndaǵy № 3 orta mektepte bilim aldym. Áýeli pıonerbolmen shuǵyldanyp, sol arqyly voleıbolǵa keldim. Kóptegen oıynshylardyń qanattanyp, túlep ushýyna sebepker bolǵan Aleksandr Andrııanovtyń kózine tústim. San Sanych «Jastar» stadıony qasynda bolǵan shaǵyn sport zalynda bizdi voleıbolǵa baýlydy. Sodan keıin jas bapker Alekseı Chıchýlın, sondaı-aq joǵary lıgada Aleksandr Peregýdanyń aldynan óttim. Sol kezde Oraldyń «Kondensatyn» baptaǵan Igor Nıkolchenko meni oqý-jattyǵý jıynyna shaqyrdy. Osylaısha, 16-17 jasymda ulttyq lıga komandasynyń qataryna iliktim.
Árıne, bári birden bola qoımaıdy. Arasynda joǵary lıga oıyndaryna qatysyp, sheberligimizdi ushtap júrdik. Petropavl qalasynda jınaqtalǵan Qazaqstan jastar quramasymen (bapkeri Marat Shaqshaqbaev) birge sheteldegi jarystarǵa, tipti Italııaǵa deıin bardyq.
Al 2008 jyly on segiz jasymda Qazaqstan ulttyq quramasy sapynda jattyǵyp, óner kórsete bastadym. Qurama tizginin qolyna alǵan belgili bapker Gennadıı Parshın olımpıadaaralyq kezeńde bolashaǵy bar jastardy daıyndaýy kerek boldy. Solardyń qatarynda jyl saıyn oqý-jattyǵý jıynyna qatysyp, tájirıbem molaıa tústi.
Oraldyń «Kondensat» klýbymen birge Qazaqstan chempıony atanyp, biraz tabysqa qol jetkizdik.
Men komandadan 2014 jyly kettim. Ol kezde baıyrǵy voleıbolshylardyń ornyn jastar basa bastady. Tájirıbelilerden ýkraınalyq baılanystyrýshy Roman Handrolın boldy. Ol áli kúnge «Aqtóbede» óner kórsetýde. Romannyń otandasy Vasılıı Týpchıı qazir Frantsııada júr.
«Kondensatta» qalǵandary jergilikti oıynshylar boldy. Biraq 2015 jyly komanda tarap ketkennen keıin Oralda ulttyq lıgada oınaıtyn klýb bolmady.
- Oıynshylardyń bári jan-jaqqa ketti deısiz ǵoı?
- Iá, Oral voleıbolynyń túlekteri basqa komandalardyń namysyn qorǵady. Aıtalyq, Anton Kýznetsov Almatyǵa jol tartsa, Vladımır Prokofev «TNK-Qazhrom» komandasyna aýysty.
Petr Chýrzın qazirgi kezde Atyraýda oınap júr. Ótken jyly shırek fınalda «Atyraýmen» betpe-bet kelgen kezde Petıa sheberligimen kózge túse bildi. Atyraýlyqtar aldymyzdy orap ketip, jartylaı fınalǵa ótse, biz besinshi oryndy qanaǵat tuttyq.
- Besinshi oryn demekshi, komandanyń bas bapkeri Vıktor Kozık sodan qorytyndy shyǵaryp, tájirıbeli oıynshylardy shaqyrdy ǵoı. Sonyń nátıjesinde «Jaıyq» bıyl turaqty chempıonatty birinshi orynmen qorytyndylady.
- Komanda basshysy Azamat Nurmuhanbetov, BQO voleıbol federatsııasynyń prezıdenti Tilepbergen Kaıýpovtyń osy oıyn túrine den qoıyp, qoldaýy nátıjesinde Oralda voleıbol qaıta jandandy deýge bolady. Ótken jyl sońynda ǵana iske qosylǵan «Jaıyq arena» sport kesheninde jattyǵý úshin barlyq jaǵdaı jasalǵan. Bıyl óz alańymyzda júldeli oryndar úshin talasyp kóremiz. Básekeni birden jartylaı fınaldan bastaımyz.
«Jaıyqta» birqatar ózgerister boldy. Vıtalıı Erdshteın kópten beri ulttyq lıgada oınamap edi. Ol birden tyń jigermen kiristi. Sondaı-aq «Pavlodardan» Borıs Kempa, lıbero Sergeı Okýnev shaqyryldy. Ótken jyly «Taraz» quramynda chempıon bolǵan tájirıbeli baılanystyrýshy Volodımır Kovalchýk ta komandany nyǵaıtty. Bir sózben aıtqanda, klýbta jaqsy ahýal ornyqqan, uıymshylmyz.
- Qazaqstan chempıonatynyń qorytyndy kezeńi Oralda ótetini, jergilikti jankúıerlerdiń qoldaýy kúsh beretin bolar?
- Osyǵan deıin Oralda birinshiliktiń jekelegen týrlary, kýbok oıyndary ótip júrdi. Mundaı deńgeıde alǵash ret uıymdastyrylyp otyr dep oılaımyn. Sondyqtan bar kúshimizdi salamyz.
- Klýbta ózińizden basqa jergilikti oıynshylardan Vladımır Prokofev, Aıdyn Ádilbekov bar ǵoı. Al buryn shabýyl shebine jaqyn júrgen Evgenıı Gof nelikten lıbero retinde boı kórsete bastady?
- Chempıonat barysynda lıbero Temirlan Nurmuhanbetov jambasynan jaraqat alyp qaldy. Sondyqtan bapkerimiz onyń ornyna Evgenıı Gofty qoıýdy jón kórdi. Jattyǵýda, oıynda ol dopty jaqsy qabyldaı biledi, qorǵanysqa da myǵym. Pavlodarda ótken týrda ózin kórsete bildi.
Ekinshiden, «Jaıyqta» básekelestik joǵary. Júldeli oryndardan úmitti komandalar legıonerler men tájirıbesi mol, sheberligi joǵary qazaqstandyq voleıbolshylarǵa kóbirek senim artady. Jas baılanystyrýshy Samǵat Salahııatovty alsaq, ol ázirge joǵary lıgada oınap júr. Aldaǵy jyldary qosylyp qalar.
- Sporttyq mansabyńyzdy aıaqtaǵannan keıin kim bolamyn dep sheshtińiz?
- Shynymdy aıtsam, ázirshe ol týraly oılanyp kórmeppin. Buıyrsa, áli de birneshe jyl oınaımyn.
- Oral voleıbolynyń taǵy bir túlegi, qazirgi tańda almatylyq «Býrevestnıktiń» namysyn qorǵap júrgen 42 jastaǵy lıbero Qaırat Baıbekov áli kúnge sapta ǵoı?
- Aıtatyny joq, Qaırat áli jas sııaqty, dopty tez qabyldap jatady. Degenmen shabýylshynyń róli qıyndaý, kóbirek sekirip, jıi qozǵalýǵa týra keledi. Ár oryndaǵy oıynshynyń erekshelikteri bar.
- Otbasynda óz jolyńyzdy qýatyn izbasaryńyz bar ma?
- Ulymnyń úlkeni hokkeımen aınalysady. Kishisi úsh jasta, bálkim, sony voleıbolǵa berip kóretin bolarmyz. Bárin ýaqyt kórsetedi.
- Áńgimeńizge rahmet! Sáttilik tileımin.
Eske sala keteıik, budan buryn bapkerdiń voleıbol deńgeıin kóterý úshin týǵan jerine oralǵany týraly aıtqanyn jazǵan bolatynbyz.