Qazaqstan BUU-nyń jahandyq kıberqaýipsizdik reıtınginde 40-orynǵa kóterildi

NUR-SULTAN. QazAqparat - Internettiń 100 myńnan astam hosttan turatyn ulttyq segmenti paıdalanýshylar úshin anaǵurlym qaýipsiz bola tústi. Bul týraly Astana ekonomıkalyq forýmy aıasynda ótken Cyber & Digital Security-2019 konferentsııasynda QR Tsıfrlyq damý, qorǵanys jáne aeroǵarysh ónerkásibi vıtse-mınıstri Ashat Orazbek aıtty, dep habarlaıdy QazAqparat tilshisi.

Vıtse-mınıstrdiń aıtýynsha, memlekettik organdardyń birlese atqarǵan jumysynyń nátıjesinde Qazaqstan BUU-nyń jahandyq kıberqaýipsizdik reıtınginde 82-den 40-orynǵa kóterilgen.

«Qazaqstanda azamattardyń jeke derekterin qorǵaý kepildigin qamtamasyz etý máseleleri jan-jaqty tekserilýde. Ári memlekettik, ári korporatıvtik sektorlardaǵy derekqorlarǵa qashyqtyqtan qol jetkizý tehnologııalaryn qaýipsiz paıdalanýdyń ádisterin meńgerip jatyrmyz. Budan bólek, aqparattyń qaýipsizdigin júıeli taldaý engizilip jatyr», - dedi ol.

Ashat Orazbek atap ótkendeı, osy máselelerdiń ózektiligine baılanysty, aqparatty qorǵaý salasyndaǵy kásibı aýtsorsıng qyzmetterine degen suranys artyp otyr. Sonymen qatar aqparattyq qaýipsizdik baǵytyna bólinetin bilim granttary 11 ese artyp, 60-tan 674-ke jetken.

Qazaqstandyq jáne Polsha, Malaızııa, Italııa, Ózbekstan elderinen kelgen spıkerler, halyqaralyq uıymdardyń ókilderi pikir almasty. Sarapshylar jahandyq aqparattyq qaýipsizdikti qamtamasyz etýdiń qazirgi máselelerin talqylady.

Avtory Sara Qabıqyzy