Qazaqstan boksy óz dástúrin qaıta jańǵyrtýy tıis – Rýslan Esenalın

ASTANA.KAZINFORM – Qazaqstandyq boksshylardyń Lıverpýlde ótken álem chempıonatyndaǵy jetistikterine qatysty QR Týrızm jáne sport mınıstrligi Sport jáne dene shynyqtyrý ister komıtetiniń tóraǵasy Rýslan Esenalın pikir bildirdi.

Komıtet basshysy ulttyq quramanyń aldaǵy josparlaryn da atap ótti. Onyń aıtýynsha, búgingi jeńister Qazaqstan boksynyń durys baǵytta damyp kele jatqanyn kórsetedi.

Elimizdiń qurama komandasy tájirıbeli, tehnıkalyq turǵyda sapaly boks kórsete bildi. Biraq biz qol jetkizgen jetistiktermen toqtap qalmaımyz. Aldaǵy basty mindet – 2026 jylǵy Azııa oıyndary men 2028 jylǵy Olımpıada oıyndary. Qazirgi ýaqytta josparly daıyndyqty bastap kettik, qatelikterdi saraptap, alǵa jyljımyz, – dedi Esenalın.

Sonymen qatar Rýslan Esenalın bapkerlik shtabtyń, sonyń ishinde shaqyrylǵan sheteldik mamandardyń eńbegin erekshe atap ótti.

– Kamacho bastaǵan sarapshylardyń jetekshiligimen júrgizilgen fýnktsıonaldyq daıyndyq boksshylarymyzdyń úshinshi raýndta da qarqynyn joǵaltpaı, fızıkalyq turǵydan daıyn bolýyna yqpal etti. Demek, atqarylǵan jumys durys baǵytta júrgizilip jatyr, – dedi komıtet tóraǵasy.

Kazinform tilshisiniń «kútken nátıjeden tómen kórsetken sportshylardyń ornyna jańa quram engizilýi múmkin be?» degen saýalyna Rýslan Esenalın bylaı dep jaýap berdi:

– Bizde jas boksshylardyń da úlken qory bar, olar irikteýge daıyn. Biraq keıbir sportshylardyń nege álem chempıonatyna babynda kele almaǵanyn túsinýimiz qajet. Taldaý júrgizemiz, sodan keıin naqty sheshim qabyldanady, – dedi ol.

Sondaı-aq komıtet basshysy Qazaqstanda boks pen kúrestiń básekelestigine de toqtaldy.

– Boks sózsiz №1 sport. Bul – bizdiń dástúrimiz, biz ony qaıta jandandyrýymyz qajet. Degenmen, balýandarymyzdyń da múmkindigi zor, ásirese olımpıadalyq emes salmaq dárejelerinde, – dedi Rýslan Esenalın.

Eske sala keteıik, Memleket basshysy bokstan Álem chempıonatynda top jarǵan boksshylardy quttyqtady.