Qazaqstan bıdaıy tıelgen alǵashqy poıyz Armenııaǵa jetti
ASTANA. KAZINFORM – Qazaq bıdaıy tıelgen, Ázerbaıjan arqyly tranzıtpen ótetin alǵashqy poıyz Armenııanyń Aırým stantsııasyna bardy, dep habarlaıdy Kazinform agenttiginiń menshikti tilshisi.
Poıyz quramy Qazaqstan-Reseı-Ázerbaıjan-Grýzııa-Armenııa baǵyty boıynsha júrdi. Qazaqstannan barlyǵy 15 vagon, jalpy salmaǵy 1000 tonna bıdaı jóneltildi. Pılottyq jetkizilim jańa logıstıkalyq baǵytty synaqtan ótkizýge jáne onyń tıimdiligin tekserýge baǵyttalǵan.
Aırým stantsııasynda poıyzdy Qazaqstan Respýblıkasynyń Armenııadaǵy Tótenshe jáne Ókiletti Elshisi Bolat Imanbaev, «Azyq-túlik kelisimshart korporatsııasy» UK AQ basqarýshy dırektory Tobylbek Omarov, Armenııa Respýblıkasynyń aýmaqtyq ákimshilik jáne ınfraqurylym mınıstri Davıd Hýdatıan, sondaı-aq Armenııanyń ekonomıka mınıstriniń orynbasary Arman Hodjaıan qarsy aldy.
– Bul – tarıhı oqıǵa. Biz Qazaqstan Prezıdentiniń ótken jyldyń sáýirinde Armenııaǵa resmı sapary kezinde qol jetkizilgen joǵary deńgeıdegi kelisimderdiń arqasynda jetkizilýi múmkin bolǵan qazaqstandyq bıdaı tıelgen alǵashqy poıyzdy qarsy alyp otyrmyz. Búgingi is-shara – ekijaqty qarym-qatynastyń qarqyndy damýynyń aıqyn dáleli. Qazaqstan astyqty turaqty jáne ózara tıimdi negizde jetkizýdi jalǵastyrýǵa daıyn, - dep atap ótti qazaqstandyq dıplomat.
Óz kezeginde, «Azyq-túlik kelisimshart korporatsııasy» UK AQ basqarýshy dırektory Tobylbek Omarov Qazaqstannyń Ázerbaıjan men Grýzııa sııaqty aımaqtyq elderge bıdaıdy belsendi túrde eksporttaıtynyn jáne Armenııaǵa jetkizýdi keńeıtýdi josparlap otyrǵanyn atap ótti.
- Jańa baǵyttyń ashylýy tasymaldaýdy ekonomıkalyq jaǵynan tıimdirek júrgizý múmkindigin ashty. Bul Armenııaǵa jetkizý qunyn aıtarlyqtaı tómendetedi. Osy jyldyń sońyna deıin biz aı saıyn keminde 15-20 myń tonnadan kem emes qazaqstandyq bıdaıdy jetkizýdi uıymdastyrýdy josparlap otyrmyz, - dedi ol.
Eske sala ketsek, Ázerbaıjan prezıdenti Ilham Álıev Qazaqstanǵa memlekettik sapary kezinde Ázerbaıjan aýmaǵy arqyly Armenııaǵa júk tasymaldaýǵa qoıylǵan shekteýlerdiń alynyp tastalǵanyn jarııalady.
Armenııaǵa alǵashqy júk tranzıti retinde qazaqstandyq bıdaı jiberildi.
Armenııa premer-mınıstri Nıkol Pashınıan Qazaqstan prezıdenti Qasym-Jomart Toqaevqa Ázerbaıjannyń júk tranzıtine qoıǵan shekteýlerdi alyp tastaý týraly kelisimge qol jetkizgeni úshin alǵys aıtty.