Qazaqstan bıdaıy alǵash ret Ázerbaıjan arqyly Armenııaǵa jiberildi
ASTANA. KAZINFORM — Qazaqstandyq bıdaıdyń alǵashqy «pılottyq» partııasy Ázerbaıjan arqyly Armenııaǵa jóneltildi, dep habarlaıdy Kazinform agenttiginiń menshikti tilshisi.
Bul qadam 21 qazanda Astanada Qazaqstan Prezıdenti Qasym-Jomart Toqaev pen Ázerbaıjan Prezıdenti Ilham Álıev arasynda qol jetkizilgen ýaǵdalastyqtardyń nátıjesi boldy.
Tranzıttik júkterge qoıylǵan shekteýlerdiń resmı túrde alynyp tastalýy Qazaqstan, Reseı, Ázerbaıjan, Grýzııa jáne Armenııany baılanystyratyn jańa temirjol baǵytynyń ashylýyna jol ashty.
Búgin qazaqstandyq bıdaı tıelgen poıyz Ázerbaıjan shekarasynan ótti. Aldaǵy kúnderi júk Armenııadaǵy Dalarık stantsııasyna jetkiziledi. Qazaqstannan barlyǵy 15 vagon, jalpy salmaǵy 1000 tonna azyq-túlik bıdaıy jóneltilgen. Bul jetkizilim — jańa logıstıkalyq baǵytty synaqtan ótkizýge arnalǵan pılottyq partııa.
Bakýge jumys sapary aıasynda «Azyq-túlik kelisimshart korporatsııasy» AQ basshylyǵy Qazaqstannyń Ázerbaıjandaǵy elshiligi ókilderimen kezdesý ótkizdi. Taraptar tranzıttik júkti úılestirý men ony armıan seriktesterine ýaqtyly jetkizýdi birlese qamtamasyz etip otyr.
— Sońǵy aılarda Qazaqstan men Ázerbaıjan arasyndaǵy astyq jetkizý salasyndaǵy yntymaqtastyqta turaqty oń serpin baıqalady. Bıyl Qazaqstan Ázerbaıjan naryǵyna negizgi bıdaı jetkizýshige aınaldy sońǵy derekter boıynsha, bizdiń úlesimiz shamamen 80 paıyz. Prezıdent Ilham Álıevtiń Astanaǵa memlekettik sapary barysynda memleketter basshylary bul jetistikterdi atap ótip, ózara yntymaqtastyqty odan ári keńeıtýge nıetti ekenderin bildirdi, — dedi Qazaqstannyń Ázerbaıjandaǵy elshisi Álim Baıel.
«Azyq-túlik kelisimshart korporatsııasy» AQ basqarma tóraǵasy Asylhan Djývashev jańa tranzıttik baǵyttyń ashylýy qazaqstandyq astyq eksportynyń geografııasyn keńeıtip qana qoımaı, óńir elderi arasyndaǵy kólik-logıstıkalyq baılanystardy damytýda mańyzdy ról atqaratynyn atap ótti.
— Bul qadam sondaı-aq Ońtústik Kavkazdaǵy saýda-ekonomıkalyq yntymaqtastyqty nyǵaıtýǵa jáne beıbit bastamalardy ilgeriletýge yqpal etedi, — dedi ol.
«Azyq-túlik kelisimshart korporatsııasy» — Qazaqstannyń ulttyq astyq naryǵynyń operatory. Kompanııa eldiń azyq-túlik qaýipsizdigin qamtamasyz etedi, ishki naryqty turaqtandyrý, aýyl sharýashylyǵy óndirýshilerin qoldaý jáne memlekettik agrarlyq saıasatty iske asyrýmen aınalysady.
Buǵan deıin Qazaqstan Ázerbaıjanǵa agroónerkásip ónimderiniń keń túrin qamtıtyn eksporttyq qorjyndy keńeıtýdi usynǵan bolatyn. Sonymen qatar, bıyl Qazaqstan astyq eksportyn Eýropa, Azııa jáne Soltústik Afrıka elderine de bastady.
Aıta ketelik mınıstr astyq eksporty týraly: Iran, Ázerbaıjan, Armenııa, Grýzııa naryqtaryn ózimizge qaıtarǵanyn aıtqan edi.