Qazaqstan bıdaı tuqymyn shetelden tasymaldaýdy azaıtady - mınıstr

Aýyl sharýashylyǵy mınıstri Aıdarbek Saparov bıdaıdyń otandyq suryptaryna qatysty túsinik berdi, dep habarlaıdy Kazinform.

Senatta agrarlyq ǵylymdy damytý taqyrybyna arnalǵan Úkimet saǵatynan keıin tilshiler mınıstrge bıdaıdyń jańa suryptaryn óndirý múmkindigine qatysty suraq qoıdy.

«Bıdaı boıynsha tuqymmen ózimizdi 60 paıyzǵa qamtamasyz etip otyrmyz. Al 40 paıyzyn shetelden jetkizip jatyrmyz. Bul turǵyda osy kórsetkishti 80 paıyzǵa jetkizý josparyn belgiledik», — dedi A. Saparov.

Bul turǵyda ol elimizde biraz jańa bıdaı suryptaryn óndirý kerek ekenin aıtty.

«Byltyr 40 sort shyǵyrylyp, sonyń 20-sy ǵana synaqtan ótken. Al qalǵan 20-sy birinshi deńgeıdegi synaqpen qamtyldy. Ary qaraı sharýshylyqtarǵa jetkizgennen keıin onyń ónimdiligin kóremiz. Ónimi jaqsy bolsa, suranys kóbeıse, jańa suryptardy ary qaraı óndire bastaımyz», — dedi mınıstr.

Búgin sondaı-aq Senat tóraǵasynyń orynbasary Jaqyp Asanov agrarlyq ǵylymı jetistikter tek qaǵaz júzinde qalyp, óndiriske engizilmeı jatqanyn synǵa alǵan edi.