Qazaqstan benzın eksporttaýshy elge aınaldy
2020 jyldyń qańtar-tamyzynda Qazaqstannyń munaı óńdeý zaýyttary avıaotyndy qosa alǵanda 2,9 mln tonna benzın shyǵardy. Bul ótken jylǵy kórsetkishten 3,3 paıyzǵa kóp. 2019 jyldyń ishinde elimizde 4,5 mln tonna motor otyny óndirilgen bolatyn. Kórsetkish 2018 jylmen salystyrǵanda 14,7 paıyzǵa joǵary.
Óńirlik shekte óndirilgen ónimiń eń úlken kólemi «PetroQazaqstan Oıl Prodakts» JShS jumys isteıtin Shymkent qalasyna tıesili. Óńirde óndirilgen ónim jalpy respýblıkada shyǵarylǵan janar-jaǵarmaıdyń 44,9 paıyzyn quraıdy. Shymkent zaýytynda 1,3 mln tonna benzın óndirilip otyr. Bul bir jyl burynǵy kórsetkishten 8,7 paıyzǵa kóp.
Al ekinshi orynda turǵan Pavlodar oblysynda 858,7 myń tonna benzın óndirilgenimen, óndiris kólemi jyl ishinde 1,9 paıyzǵa kemigen.
Atyraý oblysyndaǵy munaı óńdeý zaýyty da jyl ishinde óndiris kólemin 1,1 paıyzǵa tómendetip aldy. Óńirde 688,7 myń tonna janar-jaǵarmaı shyǵaryldy.
7 aıdyń qorytyndysynda otandyq kompanııalar benzın suranysyn (ishki naryq pen eksportty qosa alǵanda) tolyqtaı qamtamasyz etti. Import úlesi kóp emes, nebári 0,03 paıyz ǵana. Bir jyl ishinde otyn ımporty 25 ese tómendedi. Al eksport úlesi 11,1 paıyzdy qurady. Kompanııalar ótken jylmen salystyrǵanda onyń kólemin 44 esege arttyryp, 276,7 myń tonnaǵa jetkizdi.
Al 2020 jyldyń qańtar-tamyzynda kompanııalar 362,1 myń tonna avtomobıl benzınin eksportqa shyǵaryp, ósim kólemin 57,6 esege jetkizdi. Aqshaǵa shaqqanda eksport 125,6 mln dollar boldy. Bul ótken jylǵy túsimnen 48,5 ese kóp. TMD elderine 36,7 mln dollar somaǵa 103,3 myń tonna benzın jóneltildi. Qazaqstan benzıniniń negizgi ımporttaýshy elderi - Qyrǵyzstan, Tájikstan jáne Ózbekstan. Álemniń qalǵan elderine 88,9 mln dollarǵa 258,8 myń tonna avtomobıl benzıni jiberildi. Negizgi ımporttaýshylar: Aýǵanstan, Nıderlandy jáne Grýzııa.
2020 jyldyń qyrkúıeginde elimizdiń ishki naryǵynda benzın baǵasy shamaly jyldyq ósim kórsetti. AI-92 benzıni bir jyl ishinde 2,8 paıyzǵa qymbattap, lıtri 150,8 teńgeni, AI-95/95 1,2 paıyz ósimmen 171,4 teńgeni, AI-98 1,5 paıyz ósimmen 190,2 teńgeni qurady.
