Qazaqstan batystyń Himars jáne Leopard áskerı tehnıkasyn satyp ala ma

Qorǵanys mınıstriniń orynbasary Baqytbek Sydyqov Qazaqstan Qarýly kúshterine qaı elderdiń áskerı tehnıkasy satyp alynyp jatqanyn aıtty, dep habarlaıdy Kazinform.

Búgin Senattyń jalpy otyrysynan keıin tilshiler Qorǵanys mınıstriniń orynbasarynan elimizdiń Qarýly kúshterine batys elderiniń tankileri men artıllerııasyn satyp alý múmkindigi jaıynda surady.

«Himars tehnıkasyn, Leopard, Abrams tankilerin jáne batystyń áskerı ushaqtaryn satyp alý qarastyrylyp jatyr ma?» dep suraq qoıdy tilshiler.

Óz kezeginde Baqytbek Sydyqov qazir álemdegi qarýly qaqtyǵystar kezinde qoldanylyp jatqan ozyq tehnologııa zerttelip jatqanyn aıtty.

«Qazir bul tehnıka úlgileri tym qymbat bolýyna baılanysty qarastyrmadyq. Biz baǵa men sapaǵa turaqty monıtorıng jasaımyz. Sonyń negizinde atalǵan áskerı tehnıkadan kem túspeıtin basqa úlgilerin tańdap jatyrmyz», - dedi mınıstrdiń orynbasary.

Onyń aıtýynsha, Reseı men Belarýs ónimderin satyp alýǵa sanktsııa engizilgennen keıin qazir basqa eldermen kelissóz júrip jatyr.

Olardyń qatarynda Túrkııa, Qytaı, Serbııa bar.