Tramptyń eks-keńesshisi qupııa aqparatty jarııalaý isine qatysty kinásin moıyndamady
ASTANA. KAZINFORM – AQSh-tyń burynǵy ulttyq qaýipsizdik jónindegi keńesshisi Djon Bolton qupııa aqparattyń jarııalanýyna qatysty qozǵalǵan is boıynsha ózine taǵylǵan barlyq 18 aıypty joqqa shyǵardy, dep habarlaıdy DW.
17 qazanda Merılend shtatynyń Grınbelt qalasyndaǵy sotta ótken alǵashqy tyńdaýda Bolton kinásiz ekenin málimdedi. Sot otyrysyna qatysqannan keıin ol eshqaıda ketpeý týraly qolhatpen bosatyldy. Kelesi tyńdaý 21 qarashaǵa belgilengen.
Tergeý materıaldaryna sáıkes, Bolton memlekettik jáne sheteldik sheneýniktermen kezdesýler kezinde jazylǵan qupııa jazbalardy jeke elektrondyq poshtasy men messendjerleri arqyly áıeli men qyzyna jiberip otyrǵan. Bul hattarda AQSh armııasynyń aldaǵy operatsııalary, shetel kóshbasshylary jáne syrtqy saıasatqa qatysty derekter bolǵan.
FBR 2025 jylǵy 22 tamyzda Boltonnyń úıi men keńsesinde tintý júrgizip, qupııa qujattardy tapqan. Olardyń qatarynda jappaı qyryp-joıý qarýy, AQSh-tyń BUU-daǵy ókildigi jáne strategııalyq baılanystarǵa qatysty materıaldar bolǵan.
16 qazanda úlken qazylar alqasy oǵan segiz epızod boıynsha qupııa aqparatty úshinshi tulǵalarǵa berý jáne on epızod boıynsha mundaı derekterdi zańsyz saqtaý aıybyn taqqan. Árbir bap boıynsha eń joǵarǵy jaza — 10 jylǵa deıin bas bostandyǵynan aıyrý.
Djon Bolton bul isti óziniń «The Room Where It Happened: A White House Memoir, 2020» atty kitabynyń jarııalanýyna kedergi keltirý áreketteriniń jalǵasy dep esepteıdi. Ol atalǵan kitapta Donald Tramptyń áreketterin qatań synǵa alǵan.
Boltonnyń aıtýynsha, ádilet mınıstrligi kitapta qupııa aqparat bar degen syltaýmen onyń jarııalanýyn toqtatýǵa tyrysqan. Alaıda avtor qoljazbany aldyn ala arnaıy qyzmetterge teksertip, eskertýlerdiń bárin túzetkenin aıtady.
Kitap jaryq kórgen soń Donald Tramp burynǵy keńesshisin «zańsyz qupııa aqparat taratty» dep aıyptap, ony «túrmege qamalýǵa tıis adam» dep ataǵan bolatyn.
Aıta keteıik, Tramptyń burynǵy keńesshisi Djon Bolton qylmystyq jaýapkershilikke tartyldy.