Qazaqstan bankteri qyzmetkerlerdiń smartfondaryn baqylaýǵa almaq

ASTANA. QazAqparat - Bank operatsııalarynyń jekelegen túrlerin júzege asyratyn bankter men mekemelerdiń aqparattyq qaýipsizdigin qamtamasyz etetin jańa talaptar bekitildi, dep habarlaıdy QazAqparat tilshisi Ulttyq banktiń 27 naýryzdaǵy qaýlysyna silteme jasap.

Erejege saı, eger qyzmetker banktiń aqparattyq aktıvterin óńdeý úshin jeke mobıldik qurylǵylardy paıdalanatyn bolsa, onda arnaıy baǵdarlamalyq jasaqtama ornatylatyn bolady. Ol jeke aqparattardy jáne banktiń aqparattyq aktıvterin bólip otyrady. Mobıldik qurylǵylarǵa ornalastyrylǵan banktiń barlyq aqparattary shıfrlanatyn bolady. 

Sondaı-aq, jańa ereje boıynsha, bankter men mekemeler jumys stansalary men mobıldik qurylǵylardyń esebin korporatıvtik jelide júrgizýi tıis. Esepteý júıesi elektrondy nemese qaǵaz túrinde bolady. Ol jumys stansasynyń ornalasqan orny men jeke qurylǵylardyń kimge tıesili ekendigin naqty túrde anyqtaıdy.

Budan bólek, paıdalanýshylarǵa jumys stansalaryn, perıferııalyq jabdyqtar men baǵdarlamalyq jasaqtamalardy ornatýǵa jáne olardy retke keltirýmen aınalysýǵa tyıym salynady.