Qazaqstan baqytty elderdiń álemdik reıtınginde 40-orynǵa turaqtady

NUR-SULTAN. QazAqparat – Qazaqstan baqytty elderdiń álemdik reıtınginde 40-orynǵa turaqtady, dep habarlaıdy QazAqparat tilshisi.

2019-2021 jyldardyń aralyǵynda 3 jyl boıy júrgizilgen reıtıng álemdik saýalnama nátıjeleriniń ortasha kórsetkishine negizdelgen.

Reıtıngke álemniń 146 eli kiredi.

Oǵan sáıkes, eń baqytty elderdiń kóshbasynda Fınlıandııa bolsa, odan keıingi oryndarǵa Danııa men Islandııa jaıǵasqan.

Tórtinshi orynda Shveıtsarııa tur. Al úzdik bestikti Nıderland qorytyndylaıdy.

Sonymen qatar úzdik ondyqtyń qataryna Lıýksembýrg, Shvetsııa, Norvegııa, Izraıl, Jańa Zelandııa elderi kiredi.

Eýropalyq elderdiń ishinde Germanııa 14-orynda tur. Al AQSh 16-orynǵa jaıǵasqan. Birikken Arab Ámirlikteri 24-orynda.

Qazaqstannyń orny - 40, al kórshiles Ózbekstan 53-orynǵa, Qyrǵyzstan 54-orynǵa, Belarýs 64-orynǵa, Reseı 80-orynǵa, Armenııa 82-orynǵa, Tájikstan 83-orynǵa, Ázerbaıjan 92-orynǵa ornalasqan.

Reıtıngtiń eń tómengi oryndarynda turǵan elder mynalar: Zımbabve, Lıvan, Aýǵanstan.